नवी मुंबई: अल्पवयीन मुलीला पळविले; आरोपी पोलिसांच्या ताब्यात

नवी मुंबई : रबाळे परिसरात राहणाऱ्या एका अल्पवयीन मुलीला (Minor girl abduction) फूस लावून पळवून नेणाऱ्या आकाश पाटील (culprit aakash patil) या आरोपीला अनैतिक मानवी वाहतूक प्रतिबंधक कक्षाने कोल्हापूर येथून मुलीसह ताब्यात घेतले. त्याच्या ताब्यात असलेल्या अल्पवयीन मुलीची सुटका करून तिला पालकांच्या स्वाधीन केले. अल्पवयीन मुलगी रबाळे (rabale) परिसरात राहते. काही महिन्यांपूर्वी त्याच परिसरात राहणाऱ्या आकाश पाटील या तरुणासोबत ओळख होऊन मैत्री झाली.

त्यानंतर आकाश याने पीडित मुलीला आपल्या प्रेमाच्या जाळ्यात ओढून आणि फूस लावून पळवून नेले होते. मुलगी अचानक बेपत्ता झाल्याने मुलीच्या आई-वडिलांनी तिचा सर्वत्र शोध घेऊन रबाळे पोलिस ठाण्यात तक्रार दाखल केली. त्यानुसार पोलिसांनी शोध सुरू केला होता.
दुसरीकडे अनैतिक मानवी वाहतूक प्रतिबंधक कक्षाने वरिष्ठ पोलिस निरीक्षक पराग सोनवणे यांच्या पथकाने या गुन्ह्याचा तपास सुरू केला होता.

पथकाने तांत्रिक तपासाद्वारे माहिती काढली असता, या गुन्ह्यातील पीडित मुलगी आणि आरोपी आकाश पाटील हे दोघे कोल्हापूर येथे असल्याची माहिती मिळाली. त्यानुसार अनैतिक मानवी वाहतूक प्रतिबंधक कक्षाच्या पथकाने कोल्हापूर पेठ पडगाव येथे दोघांचा शोध घेऊन मुलगी व आकाश पाटील या दोघांना ताब्यात घेतले.