आयुष्यात कष्ट करण्याची तयारी ठेवा, यश नक्की मिळते - स्वप्नील बांदोडकर

मुंबई : सुरुवातीच्या काळात मलाही दहा वर्षे संघर्ष (Struggle in life) करावा लागला. माझे सुरुवातीचे अनेक अल्बम अपयशी ठरले. मात्र, मी हार मानली नाही. मी चिकाटीने आणखी चांगले काम करण्याचा प्रयत्न केला आणि मला ‘राधा ही बावरी’च्या (Radha hi bawari song) निमित्ताने यश मिळाले. तुम्हीही कधी हार मानू नका. आयुष्यात कष्ट करण्याची तयारी ठेवा. यश नक्की मिळते, असा सल्ला प्रसिद्ध गायक स्वप्नील बांदोडकर (swapnil bandodkar) याने दिला. आपल्या संगीतमय कारकिर्दीतील अनुभव त्याने ‘यिन’च्या (Sakal YIN) तरुणांसोबत शेअर केला.

प्रसिद्ध संगीतकार अशोक पत्की यांच्या सान्निध्यात मी संगीताचे धडे गिरवले. ते मला नेहमी सांगायचे की, स्वतःला पूर्ण तयार केल्याशिवाय गायन क्षेत्रात किंवा चित्रपट जगतात उतरू नकोस. त्यामुळे मी स्वतःवरच प्रचंड मेहनत घेतली. त्यातूनच एके दिवशी ‘राधा ही बावरी’ अल्बम तयार झाला. त्यातली गाणी रसिकांना प्रचंड आवडली. आमचे गाण्यातील जे प्रयोग आधी रसिकांनी नाकारले होते तेच नंतर त्यांना भावले.

माझी ‘गालावर खळी’ अन् ‘राधा ही बावरी’ गाणी त्यांनी डोक्यावर घेतली. आजही रसिक माझ्या गाण्यांवर भरभरून प्रेम करतो. त्यातून मी एक शिकलो की, आयुष्यात कितीही अपयश आले तरी खचून जायचे नाही. मेहनत करत राहायची. आपल्याला यश मिळतेच. त्यामुळे कधीही अपयशाला घाबरू नका. त्याचा सामना करा. तुम्हाला आयुष्यात यश नक्की मिळेल, असा आत्मविश्वास स्वप्नीलने युवकांना दिला. युवकांच्या आग्रहाखातर स्वप्नीलने ‘गालावर खळी’ आणि ‘राधा ही बावरी’ गाणी सादर केली. युवकांनीही तालावर ठेका धरून गाण्याचा आनंद घेतला.

खचून गेलो नाही

गायन क्षेत्रात साधारण २५ वर्षांपूर्वी मी स्ट्रगल सुरू केला. माझ्यासोबत प्रसिद्ध संगीतकार अजय-अतुल आणि गायिका वैशाली सामंतही होत्या. आम्ही तेव्हा मराठी गाण्यांमध्ये अनेक नवनवीन प्रयोग केले. मात्र, तेव्हा तो ट्रेंड नव्हता. त्यामुळे आमची गाणी रसिकांना रुचली नाहीत. सुरुवातीचे माझे सात ते आठ अल्बम अपयशी ठरले. त्यानंतर खचून न जाता मी स्वतःमध्ये काही बदल केले. पुन्हा काही प्रयोग केले आणि अखेर यश मिळाले, असे स्वप्नील बांदोडकर म्हणाला.