१ लाख ७३ हजार ५८६ विद्यार्थ्यांना सवलतीचे गुण

मुंबई, ता. २ : दहावीच्या परीक्षेत राज्यातील एकूण १ लाख ७३ हजार ५८६ विद्यार्थ्यांना सवलतीचे गुण मिळाले आहेत. सवलतीच्या गुणांचा लाभ घेणारे सर्वाधिक विद्यार्थी कोल्हापूर जिल्ह्यातील आहेत. येथील ४२ हजार ६४९ विद्यार्थ्यांना सवलतीचे गुण मिळाले आहे; तर मुंबईतील २९ हजार ३६६ विद्यार्थ्यांना सवलतीचे गुण आहेत.

विद्यार्थ्यांसाठी समुपदेशक
राज्य शिक्षण मंडळाने निकालानंतर नकारात्मक विचाराने ग्रासलेल्या विद्यार्थ्यांना मार्गदर्शन करण्यासाठी २५ जूनपर्यंत ऑनलाईन समुपदेशनाची सुविधा उपलब्ध करून दिली आहे. सकाळी ८ ते रात्री ८ या वेळेत विविध समस्यांवर विद्यार्थ्यांना मार्गदर्शन केले जाणार आहे. यासाठी ७३८७४००९७०, ८३०८७५५२४१, ९८३४९५१७५२, ८४२११५०५२८, ९४०४६८२७१६, ९३७३५४६२९९, ९३२१३१५९२८, ७३८७६४७९०२, ८७६७७५३०६९ आदी समुपदेशकांचे संपर्क क्रमांक देण्यात आले आहेत.

गुणपडताळणीसाठी ३ ते १२ जूनचा कालावधी
निकालानंतर गुणपडताळणीसाठी ३ ते १२ जून, छायाप्रतीसाठी ३ ते २२ जून या कालावधीत अर्ज करता येईल. गुणांच्या पुनर्मूल्यांकनासाठी आधी उत्तरपत्रिकेची छायाप्रत घेणे बंधनकारक आहे. पुनर्मूल्यांकनासाठी विद्यार्थ्यांनी स्वतः किंवा शाळेमार्फत विभागीय मंडळाकडे ऑनलाइन अर्ज करणे आवश्यक असल्याचे स्पष्ट करण्यात आले; तर पुनर्परीक्षार्थी आणि श्रेणी सुधारू इच्छिणाऱ्या विद्यार्थ्यांसाठी जुलै-ऑगस्टमध्ये पुरवणी परीक्षा घेण्यात येणार आहे. त्यासाठीची ऑनलाइन अर्ज प्रक्रिया ७ जूनपासून सुरू होणार आहे.

१०० टक्के गुण मिळणारे विद्यार्थी
लातूर - १०८
संभाजीनगर - २२
अमरावती - ७
मुंबई - ६
पुणे - ५
कोकण -३
नाशिक, नागपूर, कोल्हापूर - ०