अनिल परब यांना ईडीचा धक्का

सकाळ वृत्तसेवा
मुंबई, ता. ४ : शिवसेना ठाकरे गटातील नेते आणि माजी मंत्री अनिल परब यांच्यावर ईडीची टाच आली असून त्यांची तब्बल १०.२० कोटींची संपत्ती ईडीने बुधवारी तात्पुरती जप्त केली आहे. दापोलीतील साई रिसॉर्टप्रकरणी ईडीकडून ही कारवाई करण्यात आली आहे. जप्त करण्यात आलेल्या मालमत्तेमध्ये ४२ गुंठे जमीन आणि साई रिसॉर्टचा समावेश असल्याचे ईडीने परिपत्रकात म्हटले आहे.
ईडीने म्हटले आहे, की अनिल परब यांनी साई रिसॉर्टशी संबंधित परवानग्या मिळवताना स्वतःची मालक म्हणून ओळख लपवली. विभा साठे नावाच्या व्यक्तीच्या नावाने सर्व परवानग्या मिळवल्या. ग्रामपंचायत आणि महाराष्ट्र सरकारची फसवणूक करून परवानग्या मिळवल्या गेल्याचा आरोप ईडीने केला आहे. याप्रकरणी मुरूड दापोली येथील ४२ गुंठे जमीन व साई रिसॉर्टची मालमत्ता जप्त करण्यात आली आहे. ज्याची किंमत १० कोटी एवढी असल्याची माहिती मिळत आहे. केंद्र सरकारच्या पर्यावरण मंत्रालयाने ३१ जानेवारी २०२२ रोजी दापोली रत्नागिरी येथील साई रिसॉर्ट हे अनधिकृत असून तोडण्याचे आदेश दिले होते. ९० दिवसांमध्ये रिसॉर्ट मालक किंवा प्रशासनाने हे दोन्ही रिसॉर्ट तोडायचे होते; मात्र ९० दिवस पूर्ण झाले असून अजूनही रिसॉर्ट पाडण्यात आलेले नाही. या रिसॉर्टच्या व्यवहार प्रकरणात मनी लॉण्डरिंगचा आरोप करण्यात येत आहे.