ई-सिगारेटची विक्री करणारा पान शॉपचालक अटकेत

नवी मुंबई (वार्ताहर) : खारघरमधील पान शॉपमधून छुप्या पद्धतीने ई-सिगारेट आणि विदेशी सिगारेटची विक्री करणाऱ्याला नवी मुंबई पोलिसांच्या अमली पदार्थविरोधी पथकाने छापा मारून अटक केली. मिथलेश माणिकचंद साहू (वय ३९) याच्या पान शॉपमधून सुमारे ४५ हजार रुपयांचे ई-सिगारेट आणि विदेशी सिगारेट जप्त करण्यात आले. खारघर सेक्टर ४ मधील भूमी टॉवर येथील सौरभ पान शॉपमधून ई-सिगारेट व विदेशी सिगारेटची विक्री करण्यात येत असल्याची माहिती अमली पदार्थविरोधी पथकाला मिळाली होती. या माहितीच्या आधारे वरिष्ठ पोलिस निरीक्षक बी. एस. सय्यद व त्यांच्या पथकाने मंगळवारी (ता. १४) पान शॉपवर छापा मारला होता. त्या पान शॉपची तपासणी केली असता, वेगवेगळ्या कंपन्यांचे आणि फ्लेवरचे सुमारे ४५ हजार रुपयांचे ई-सिगारेट, विदेशी सिगारेटची पाकिटे सापडली. या प्रकरणी पथकाने पान शॉप चालकाविरोधात खारघर पोलिस ठाण्यात तक्रार दाखल केली.