सात रेल्वे स्थानकांत ‘ममता कक्ष’ सुविधा!

सकाळ वृत्तसेवा
मुंबई, ता. १७ : रेल्वेस्थानकांवर आपल्या तान्ह्या बाळाला दूध पाजताना महिला प्रवाशांची होणारी कुचंबणा टाळण्यासाठी मध्य रेल्वेतर्फे नॉन फेअर रेव्ह्युन्यू (एनएफआर) अंतर्गत मुंबई विभागाच्या सात रेल्वेस्थानकांत १३ ठिकाणी ‘ममता कक्ष’ उभारण्यात येत आहेत.
स्तनपान करणाऱ्या महिलांसाठी त्यांच्या प्रवासादरम्यान सुरक्षित आणि आरामदायक क्षेत्र निर्माण करण्यासाठी मध्य रेल्वेने छत्रपती शिवाजी महाराज टर्मिनस, दादर (तीन), लोकमान्य टिळक टर्मिनस (तीन), ठाणे (दोन), कल्याण, पनवेल आणि लोणावळा (दोन) असे १३ ‘ममता कक्ष’ तयार करण्यात येत आहेत. हा प्रकल्प नवीन आणि नावीन्यपूर्ण भाडे व्यतिरिक्त (नॉन फेअर) रेव्हेन्यू आयडियाज स्कीम अंतर्गत करण्यात आला आहे. हे कंत्राट मेसर्स बुलस आय मीडिया प्रायव्हेट लिमिटेडला देण्यात आले असून २७ डिसेंबरच्या स्वीकृती पत्र अंतर्गत ६० हजार रुपये प्रति नर्सिंग पॉड आणि दोन वर्षांचा करार कालावधी करण्यात आल्याचे मध्य रेल्वेकडून सांगण्यात आले.

अशी असणार सुविधा-
‘ममता कक्ष’ ही उपरोक्त स्थानकांवर एक प्रवासी सुविधा आहे. जी प्रवास आणि ट्रेन बदल करण्याच्या दरम्यान प्रतीक्षा कालावधीत बाळांच्या आहारासाठी सुरक्षित, मोफत, स्वच्छतापूर्ण जागा प्रदान करेल. ममता कक्षाचा वापर विनामूल्य असेल, तसेच नर्सिंग पॉड्समध्ये प्रदान केलेल्या डायपर चेंजिंग स्टेशनची सेवाही विनामूल्य असेल.