कामोठेत आठ बांगलादेशी घुसखोर अटकेत

पनवेल, ता. १८ (वार्ताहर) : कामोठे, सेक्टर -२२ मधील मैदानालगतच्या चाळीत बेकायदा वास्तव्यास असलेल्या आठ बांगलादेशी नागरिकांना अनैतिक मानवी वाहतूक प्रतिबंधक कक्षाने अटक केली. या कारवाईत चार पुरुष व चार महिलांना अटक करण्यात आली आहे. हे सर्व बांगलादेशी नागरिक बांधकाम साईटवर मजुरी करून तसेच घरकाम करून राहत असल्याचे तपासात आढळून आले आहे. अनैतिक मानवी वाहतूक प्रतिबंधक कक्षाचे वरिष्ठ पोलिस निरीक्षक अतुल आहेर यांच्या सूचनेनुसार सहायक पोलिस निरीक्षक नीलम पवार व त्यांच्या पथकाने ही कारवाई केली. या वेळी इरशाद तोहित मुली (वय ४०), रेश्मा इरशाद तोहीत मुल्ली (वय २२), जुनुअल मालीक इस्लम (वय ४८), पिंकी जुनुअल मालीक इस्लम (वय ३६), कोकान मनीक शेख (वय ३२), शोभाबेगम कोकान मनीक शेख (वय ३०), अनिकुल आलम समसुल आलम (वय ३४) व कविता खातुन जियाजु शेख (वय २८) आदी बेकायदा वास्तव्यास असल्याचे आढळून आले.