ठाण्यात आज ‘महिला आयोग आपल्या दारी’

ठाणे, ता. २२ : महाराष्ट्र राज्य महिला आयोगाकडून ‘महिला आयोग आपल्या दारी’ या उपक्रमांतर्गत ठाणे जिल्ह्यातील तक्रारींची जनसुनावणी मंगळवार २३ मे रोजी ठाणे जिल्हाधिकारी कार्यालयात सकाळी १०.३० वाजता होणार असून आयोगाच्या अध्यक्षा रूपाली चाकणकर आणि आयोगाच्या सदस्या या स्वतः तक्रारींची सुनावणी घेणार आहेत. ठाणे जिल्ह्यात होणाऱ्या या जनसुनावणीत अधिकाधिक महिलांनी पुढे येऊन, न घाबरता आपल्या तक्रारी यावेळी मांडाव्यात, असे आवाहन आयोगाच्या अध्यक्षा रूपाली चाकणकर यांनी केले आहे. राज्य महिला आयोगाच्या अध्यक्षा श्रीमती रूपाली चाकणकर २३ मे रोजी ठाणे जिल्ह्याच्या दौऱ्यावर येत असून त्यांच्या उपस्थितीत जनसुनावणी होणार आहे. त्यानंतर ठाणे जिल्ह्याची आढावा बैठक होईल. यावेळी जिल्हाधिकारी, कामगार आयुक्त, पोलिस अधीक्षक तसेच आरोग्य, परिवहन, शिक्षण विभागाचे अधिकारी उपस्थित असतील. जिल्हा दौरा दरम्यान वन स्टॉप सेंटर तसेच महिला वसतिगृहास ही आयोगाच्या अध्यक्षा व सदस्या भेट देणार आहेत. तसेच या जनसुनावणीला पोलिस, प्रशासन, विधी सल्लागार, समुपदेशक, जिल्हा समन्वयक उपस्थित राहणार आहेत.