उद्यान व वृक्ष प्राधिकरण विभाग बंद करा : आमदार प्रताप सरनाईक

ठाणे, ता. २७ : एका बाजूला नवी मुंबई महानगरपालिकेसह ‘ड’ वर्ग महापालिका असलेल्या मिरा-भाईंदर महापालिकेची उद्याने मात्र सुस्थितीत आहेत, पण ठाणे महानगरपालिकेतील उद्याने व वृक्ष प्राधिकरणातील अनेक वर्षांपासून ठाण मांडून बसलेल्या अधिकारी व कर्मचाऱ्यांमुळे उद्यानांची दुरवस्था झाल्याचा आरोप आमदार प्रताप सरनाईक यांनी केला. तसेच त्या विभागातील अधिकारी-कर्मचाऱ्यांना इतर खात्यांमध्ये बदली करून हा विभाग कायमचा बंद करावा व मिरा-भाईंदर महापालिकेप्रमाणे वार्षिक ठेकेदारामार्फत या उद्याने व मैदानांची दुरुस्ती व देखभाल करावी, अशी मागणी आमदार सरनाईक यांनी आयुक्त बांगर यांच्याकडे केली आहे. याबाबत त्यांनी महापालिका आयुक्तांना निवेदन दिले आहे. कळवा येथील स्व. उत्तमराव पाटील निसर्ग संरक्षण व जैवविविधता उद्यान तसेच घोडबंदर रोडवरील ‘जुने ठाणे नवीन ठाणे’ उद्यान, तसेच रुणवाल प्लाझाशेजारील बॉलीवूडच्या थीमपार्कच्या दुरवस्थेकरितासुद्धा हेच उद्यान विभागाचे अधिकारी जबाबदार आहेत. अशी टीकाही आमदार सरनाईक यांनी केली.