Mumbai News: मुलांची आईसारखी काळजी घेतली जाते; मारहाणीचे आरोप फेटाळले

गतिमंद विद्यार्थ्यांचा सांभाळ करणाऱ्या मानखुर्दच्या चिल्ड्रन एड सोसायटीतील बालगृहात गतिमंद विद्यार्थ्यांना मारझोड करत मानसिक छळ केला जात असल्याचा आरोप येथील मुख्याध्यापकांनी फेटाळून लावला आहे. गतिमंद मुलांची आईसारखी काळजी घेतली जाते, संगोपन केले जात असल्याचा दावा मुख्याध्यापकांनी केला असून तसे प्रतिज्ञापत्र त्यांनी उच्च न्यायालयात दाखल केले आहे.

विविध कारणांमुळे चर्चेत असलेल्या चिल्ड्रन एड सोसायटीत राहणाऱ्या गतिमंद विद्यार्थ्यांना अनेक गैरसोयींचा सामना करावा लागत आहे. सहायक आयुक्त, समाज कल्याण विभागाच्या दोघा अधिकाऱ्यांनी बालगृहास भेट दिली, त्यावेळी गतिमंद विद्यार्थ्यांची हेळसांड होत असल्याचे अधिकाऱ्यांच्या निदर्शनास आले.

कोविड काळात विद्यार्थ्यांची काळजी न घेणे, त्यांना पुरेसे अन्न न देणे, त्यांच्याकडून कामे करून घेणे असे प्रकार अधिकाऱ्यांच्या निदर्शनास आले असून काही मुलांनी मारझोड केल्याची तक्रार या अधिकाऱ्यांकडे केली.

याची दखल घेत समाज कल्याण विभागाच्या अधिकाऱ्यांनी चिल्ड्रन एड सोसायटीला कारणे दाखवा नोटीस बजावली. मात्र कामचुकार अधिकाऱ्यांना पाठीशी घालण्यात आल्याचे निदर्शनास आल्यानंतर सामाजिक कार्यकर्ते अभिषेक तिवारी यांनी पोलिस आयुक्त तसेच महिला व बालकल्याण विभागाच्या मुख्य सचिवांना याप्रकरणी तक्रार केली.