Mumbai News: ''एसएनडीटी''च्या विद्यार्थिनींनी समजून घेतला मुंबईचा इतिहास

Mumabai News: एसएनडीटी महिला विद्यापीठाच्या विद्यार्थिनींनी बुधवारी (ता. २८) दक्षिण मुंबईतील फोर्ट परिसरात ‘हेरिटेज वॉक’ केला.

मुंबईतील वारसास्थळांचा इतिहास समजून घेण्यासाठी या वॉकचे आयोजन करण्यात आले होते. विद्यापीठाच्या पदव्युत्तर आणि पदवीपूर्व इतिहास विभाग तसेच एसएनडीटी कला महाविद्यालय, चर्चगेटच्या संयुक्त विद्यमाने हा उपक्रम राबवला गेला.

हेरिटेज वॉकमध्ये प्रामुख्याने ओव्हल मैदानाभोवती असलेल्या व्हिक्टोरियन गॉथिक आणि आर्ट डेको आर्टच्या इमारतींचा समावेश करण्यात आला. पश्‍चिम रेल्वे मुख्यालय, मुंबई उच्च न्यायालय, राजाबाई टॉवर, नॅशनल गॅलरी ऑफ मॉडर्न आर्ट, वेलिंग्टन फाऊंटन, छत्रपती शिवाजी महाराज वस्तुसंग्रहालय आणि काळा घोडा आर्ट डिस्ट्रिक्टम यांसारख्या इमारतींचा गौरवशाली वारसा विद्यार्थ्यांनी या वॉकच्या माध्यमातून समजून घेतला.

एसएनडीटी कला महाविद्यालय तसेच विद्यापीठाच्या इतिहास, मानसशास्त्र, इंग्रजी विभागातील विद्यार्थ्यांनी यामध्ये सहभाग नोंदवला. शिक्षिका शलाका तोरणे, मेहविश शेख, ऋचा शहा, नम्रता ढवळे आणि स्वराली सायकर यांनी मार्गदर्शन केले.

हेरिटेज वॉकमुळे आपल्या वारसास्थळांकडे बघण्याचा दृष्टीकोन व्यापक झाला. तसेच मुंबईची जीवनशैली, वास्तूरचनेची माहिती मिळाल्याची प्रतिक्रिया एका विद्यार्थिनीने दिली. या प्रकारचे उपक्रम नेहमी आयोजित करण्याचा मानस वॉकच्या समन्वयक व सहायक प्राध्यापक नम्रता गणेरी यांनी बोलून दाखवला.

नजीकच्या भविष्यात विद्यार्थ्यांसाठी हेरिटेज वॉक आयोजित करण्यासाठी दोन क्रेडिट शॉर्ट टर्म अभ्यासक्रम सुरू करण्याची योजना विद्यापीठ प्रशासनाची आहे. त्यामुळे विद्यार्थ्यांना ऐतिहासिक वास्तूस्थळांची माहिती होईल.

- जास्वंदी वांबुरकर, प्राचार्य व इतिहास विभागप्रमुख