Mumbai Crime: परीक्षेत प्रश्‍नांची उत्तरे न दाखवल्याने तीन विद्यार्थ्यांनी केला चाकूहल्ला

Bhivandi Crime: परीक्षेत प्रश्‍नांची उत्तरे न सांगितल्यामुळे विद्यार्थ्यास तीन विद्यार्थ्यांनीच चाकूने मारहाण केल्याची घटना शहरातील शांतीनगर हद्दीत मंगळवारी (ता. २६) घडली.

याप्रकरणी दहावीची परीक्षा देणाऱ्या तीन अल्पवयीन विद्यार्थ्यांविरोधात गुन्हा दाखल झाला आहे.
शहरातील शांतीनगर हद्दीतील साफिया शाळेत २६ मार्च रोजी दहावीची परीक्षा सुरू असताना आसिफ साजिद शेख (वय १६) याला सह परीक्षार्थींनी प्रश्‍नांची उत्तरे विचारली, परंतु आसिफने उत्तरे दाखवण्यास नकार दिला.

त्यामुळे रागावलेल्या तीन विद्यार्थ्यांनी परीक्षा संपल्यानंतर आसिफला मारहाण केली. तसेच चाकूने वार करत त्याला जखमी केले. या झटापटीत आसिफचा मोबाईलही गहाळ झाला. या प्रकारामुळे पालकांमध्ये भीतीचे वातावरण निर्माण झाले असून परीक्षेला जाण्यापूर्वी मुलांची कसून तपासणी करण्याची मागणी केली जात आहे.