Mumbai Crime: गुंतवणुकीच्या नावाने गंडा घालणार्‍या आरोपीस अटक; वाचा नक्की कशी झाली कारवाई

Mumbai Crime: गुंतवणुकीच्या नावाने गंडा घालणाऱ्या रामावतार रामधन मीना (२६) या आरोपीस धारावी पोलिसांनी राजस्थान येथून अटक केली. तो सध्या पोलिस कोठडीत आहे.
तक्रारदार महिला ही धारावीत राहते.

मार्च महिन्यात तिला सोशल मीडियावर शेअर मार्केट ट्रेडिंगसंदर्भात एक जाहिरात दिसली होती. त्यात शेअरमध्ये गुंतवणूक केल्यास चांगला परवाता देण्याचे आमिष दाखविण्यात आले होते. त्यामुळे तिने तिथे संपर्क साधला होता. यावेळी समोरील व्यक्तीने तिला एका कंपनीच्या माध्यमातून शेअरमध्ये गुंतवणुकीचा सल्ला दिला.

चांगला परवाता मिळेल, असे सांगून तिचा विश्‍वास संपादन करण्याचा प्रयत्न केला. त्याच्या आमिषाला बळी पडून तिने क्यूआर कोड स्कॅन करून एक लाख तेरा हजार रुपये पाठवून दिले होते. मात्र, गुंतवणुकीवर तिला कुठलाही परतावा मिळाला नाही. फसवणुकीचा हा प्रकार उघडकीस येताच तिने धारावी पोलिसात तक्रार केली होती.

गुन्हा दाखल होताच वरिष्ठ पोलिस निरीक्षक राजू बिडकर यांच्या पथकातील विकास भारमल, सागर खाडे, पांडेय, कुंभार, पवार यांनी तपास सुरू केला होता. तांत्रिक माहितीवरून या पथकाने राजस्थान येथून रामावतार मीना याला ताब्यात घेतले होते. चौकशीत त्याचा गुन्ह्यात सहभाग उघडकीस आला होता.

त्यानंतर त्याला पोलिसांनी अटक केली. त्याच्याकडून पोलिसांनी एक मोबाईल, दोन सिमकार्ड आणि बँकेचे दोन पासबुक जप्त केले आहे. अटकेनंतर त्याला वांद्रे येथील स्थानिक न्यायालयात पोलिस कोठडी सुनावली आहे.