बँक खात्यासह पासवर्ड शेअर केले नसताना ऑनलाईन फसवणुक

वृद्ध महिलेला साडेपाच लाखांचा गंडा
- अंधेरीतील घटना; पासवर्ड दिला नसतानाही फसवणूक
अंधेरी (बातमीदार) ः कोणालाही बँक खात्यासह पासवर्ड शेअर केले नसताना अज्ञात सायबर ठगाने एका ६३ वर्षांच्या वयोवृद्ध महिलेसह तिच्या मुलाच्या बँक खात्यातून सुमारे साडेपाच लाखांची ऑनलाईन फसवणूक केली. याप्रकरणी वर्सोवा पोलिसांनी अज्ञात सायबर ठगाविरुद्ध फसवणुकीसह आयटी कलमांतर्गत गुन्हा नोंदवून तपास सुरू केला आहे.
३१ वर्षांचा तक्रारदार तरुण वृद्ध आई-वडिलांसोबत राहतो. त्याचे त्याच्या आईसोबत एका खाजगी बँकेत खाते आहे. १८ एप्रिलला तो त्याच्या अंधेरीतील कार्यालयात होता. यावेळी त्याला त्याच्या बँक खात्यातून अडीच लाख रुपये डेबिट झाल्याचा एक मेसेज आला होता. त्याने त्याच्या आईला पैशांबाबत विचारणा केली होती. यावेळी तिने बँकेतून ही रक्कम काढली नसल्याचे तसेच तिला अडीच लाखांबाबत काहीच माहिती नसल्याचे सांगितले. हा प्रकार संशयास्पद वाटताच त्याने बँकेत जाऊन विचारपूस केली होती. यावेळी त्याला त्याच्या वयोवृद्ध आईसह त्याच्या बँक खात्यात सुमारे साडेपाच लाख रुपये काढून अज्ञात सायबर ठगाने त्यांची फसवणूक केल्याचे दिसून आले. त्यांनी त्यांच्या बँक खात्याची माहिती, पासवर्ड कोणालाही शेअर केले नव्हते. तरीही त्यांच्या बँक खात्यातून ही रक्कम इतर बँक खात्यात ट्रान्स्फर झाली होती. हा प्रकार उघडकीस येताच त्याने वर्सोवा पोलिसांत तक्रार केली होती.