सकाळ प्रीमियर सोहळ्यात महेश कोठारे, वर्षा उसगावकर यांचा विशेष सन्मान!

‘सकाळ प्रीमियर सोहळ्या’त महेश कोठारे, वर्षा उसगावकर यांचा विशेष सन्मान!
१२ जून रोजी ठाण्यात रंगणार गौरवसंध्या

मुंबई, ता. ७ : मराठी चित्रपटसृष्टीत देदीप्यमान कामगिरी करणारे ज्येष्ठ अभिनेते, निर्माते आणि दिग्दर्शक महेश कोठारे अन् अभिनेत्री वर्षा उसगावकर यांना ‘सकाळ प्रीमियर पुरस्कार’ सोहळ्यात विशेष सन्मान प्रदान करण्यात येणार आहे. ठाण्यातील डॉ. काशिनाथ घाणेकर नाट्यगृहात बुधवारी, १२ जून रोजी होणाऱ्या कार्यक्रमात त्यांना चित्रपटसृष्टीतील योगदानाबद्दल गौरवण्यात येणार आहे.
पी. एन. जी. ज्वेलर्स लि. प्रीमियर पुरस्कार सोहळ्याचे मुख्य प्रायोजक आहेत. या सोहळ्यात सर्वोत्कृष्ट चित्रपट, दिग्दर्शक, अभिनेत्री, अभिनेता, कथा, पटकथा, गीतकार, संकलक इत्यादी पुरस्कारांबरोबरच काही मान्यवरांचा विशेष गौरव करण्यात येणार आहे.
‘छोटा जवान’द्वारे मराठी सिनेसृष्टीत पदार्पण करणाऱ्या महेश कोठारे यांनी ‘धूमधडाका’, ‘थरथराट’, ‘पछाडलेला’, ‘झपाटलेला’, ‘दे दणादण’, ‘माझा छकुला’ इत्यादी अनेक चित्रपट केले आहेत. अभिनयाबरोबरच एक उत्तम दिग्दर्शक अशी ओळख त्यांनी निर्माण केली आहे. पाच दशकांहून अधिक काळ त्यांनी प्रेक्षकांचे मनोरंजन केले. केवळ मोठ्याच नव्हे; तर छोट्या पडद्यावरही त्यांनी निर्माता म्हणून उत्तम कामगिरी केली. मराठी चित्रपटसृष्टीत देदीप्यमान कामगिरी करणाऱ्या कोठारे यांना ‘सकाळ प्रीमियर पुरस्कार’ सोहळ्यात गौरविण्यात येणार आहे.
मराठी कलाविश्वातील लोकप्रिय अभिनेत्री म्हणून वर्षा उसगावकर यांचे नाव आवर्जून घेतले जाते. उत्तम अभिनयशैली आणि सौंदर्य यांच्या जोरावर त्यांनी रसिकांच्या मनावर अधिराज्य गाजविले आहे. रंगभूमीवर काम करत त्यांनी मराठी चित्रपटसृष्टीत प्रवेश केला. ‘कार्टी प्रेमात पडली’ आणि ‘ब्रह्मचारी’ या नाटकांत त्यांनी दमदार अभिनय केला. ‘गंमत-जंमत’ चित्रपटाद्वारे त्यांनी चित्रपटसृष्टीत पदार्पण केले. ‘हमाल दे धमाल’, ‘सगळीकडे बोंबाबोंब’, ‘सवत माझी लाडकी’, ‘एक होता विदूषक’, ‘लपंडाव’, ‘अफलातून’ आदी अनेक गाजलेल्या चित्रपटांत त्यांनी काम केले आहे. अभिनय क्षेत्रातील त्यांच्या उत्तम कामगिरीसाठी त्यांचा पुरस्कार सोहळ्यात विशेष सन्मान करण्यात येणार आहे. ठाणे येथे रंगणारा प्रीमियर पुरस्कार सोहळा सर्वांसाठी खुला असून त्यात रसिकांना विनामूल्य प्रवेश देण्यात येणार आहे.