मध्यप्रदेश येथील बेताल वक्तव्य करणारे मंत्री विजय शाह विरोधात भिवंडी न्यायालयात तक्रार दाखल

भाजप मंत्र्याविरोधात न्यायालयात तक्रार दाखल
सैन्य दलाच्या अधिकारी सोफिया कुरेशींविरोधात भाजप मंत्र्यांचे बेताल वक्तव्य
भिवंडी, ता. २३ (वार्ताहर) ः ऑपरेशन सिंदूरची माहिती देण्याची जबाबदारी अधिकारी सोफिया कुरेशी व व्योमिका सिंग यांनी बजावली, परंतु मध्य प्रदेश येथील मंत्री विजय शहा यांनी सोफिया कुरेशी यांच्यासंदर्भात बेताल वक्तव्य केले. यावर देशभरातून टीका केली जात असताना भाजपने कोणतीही कारवाई केली नाही. विजय शहा यांच्याविरोधात गुन्हा दाखल करण्यासाठी भिवंडी न्यायालयात तक्रार दाखल केली आहे. या प्रकरणाची माहिती भिवंडी येथील काँग्रेस प्रदेश सरचिटणीस राणी अग्रवाल यांनी पत्रकार परिषदेत दिली. या वेळी फारुक मोमिन, आसिफ आजमी, फिरोज भिवंडीवाला हे काँग्रेस पदाधिकारी उपस्थित होते.
ऑपरेशन सिंदूरच्या माध्यमातून भारताने पाकिस्तानी सैन्यासह अतिरेक्यांना चोख प्रत्युत्तर दिले. याची माहिती देण्याची जबाबदारी सैन्य दलाच्या अधिकारी सोफिया कुरेशी यांनी सांभाळली. त्यांच्याबद्दल बेताल वक्तव्य करून विजय शहा यांनी भारतीय सैन्यातील महिलांचा अपमान केला. याप्रकरणी त्यांच्याविरोधात भा. न्या. सं. कलम १९६,१९७ नुसार गुन्हा दाखल करण्याची मागणी राणी अग्रवाल यांनी केली आहे.

‘विजय शहा यांची भाजपने हकालपट्टी करावी’
विजय शहा यांनी त्यांच्यावर केलेले आरोप हे देशात धर्म व जातीमधील सलोखा बिघडवणारे, तेढ निर्माण करणारे, द्वेषभावना पसरवणाऱ्या भावनांना प्रोत्साहन देणारे असल्याचा मुद्दा उपस्थित केला आहे. संवैधानिक जबाबदार पदावर असणाऱ्या माणसाने सोफिया कुरेशीवर लावलेले आरोप हे लांच्छनास्पद असून, हे वक्तव्य असंतोष किंवा शत्रुत्व किंवा द्वेषभावना निर्माण करणारे असल्याचा आरोप राणी अग्रवाल यांनी केला आहे. न्यायालय आमच्या तक्रारीची दखल घेईल, परंतु तत्पूर्वी भाजपने त्यांची मंत्रिपदावरून हकालपट्टी करावी, अशी मागणीसुद्धा राणी अग्रवाल यांनी केली आहे.