तंबाखू मुक्तीसाठी जनजागृती शिबिर

तंबाखू मुक्तीसाठी जनजागृती शिबिर
उरण, ता. ७ (वार्ताहर) ः उरण येथे इंदिरा गांधी ग्रामीण रुग्णालयाच्या वतीने तंबाखू मुक्ती युवा अभियान ३.० अंतर्गत जनजागृती शिबिर घेण्यात आले. या शिबिरात दंततज्ज्ञ डॉ. संतोष झापकर यांनी विद्यार्थ्यांना तंबाखूजन्य पदार्थांच्या व्यसनाबाबत मार्गदर्शन केले.
तंबाखूचे विविध प्रकार, त्यातील अपायकारक द्रव्ये आणि तंबाखू सेवनामुळे होणारे मुख कर्करोग, फुप्फुसांचे विकार, हृदयविकार, दात-हाडांचे नुकसान या गंभीर दुष्परिणामांबाबत विद्यार्थ्यांना माहिती दिली. व्यसनातून मुक्त होण्यासाठी आवश्यक उपाययोजना, समुपदेशनाची गरज, आरोग्यदायी जीवनशैली अंगीकारण्याचे महत्त्व याबाबत त्यांनी विद्यार्थ्यांशी संवाद साधला. या वेळी विद्यार्थ्यांची दातांची तपासणी करण्यात आली. शिबिरास संस्थेतील प्रशिक्षणार्थ्यांनी उत्स्फूर्त प्रतिसाद दिला. तंबाखूमुक्त समाज घडवण्यासाठी युवकांनी पुढाकार घेणे आवश्यक असल्याचे मत या वेळी व्यक्त करण्यात आले.