आयटीआयच्या नव्या इमारतीसाठी निधी

आयटीआयच्या नव्या इमारतीसाठी निधीच्या मागणीला यश
विरार, ता. १५ (बातमीदार) : वसई येथील शासकीय औद्योगिक प्रशिक्षण संस्थेच्या (आयटीआय) प्रशस्त इमारतीच्या बांधकामासाठी आमदार राजन नाईक यांच्या प्रयत्नांना मोठे यश मिळाले आहे. आमदार राजन नाईक यांनी आयटीआय इमारतीसाठी ६५ कोटी रुपयांच्या निधीची मागणी केली. या मागणीनंतर राज्याचे कौशल्य विकास व उद्योजकता मंत्री मंगलप्रभात लोढा यांनी संबंधित अधिकाऱ्यांना प्रस्ताव सादर करण्याचे निर्देश दिले आहेत.
वसईतील पाचूबंदर येथे खासगी इमारतीत सुरू असलेल्या आयटीआयसाठी विरार येथील गट क्रमांक ३७६ येथे राज्य सरकारने जागा उपलब्ध करून दिली आहे. मंत्री लोढा यांच्या निर्देशामुळे वसई येथे आयटीआयची सुसज्ज आणि आधुनिक इमारत लवकरच उभी राहणार आहे. वसईतील वाढता औद्योगिक विस्तार आणि युवकांसाठी दर्जेदार तांत्रिक शिक्षणाच्या दृष्टीने ही नवीन इमारत महत्त्वपूर्ण ठरणार आहे.