दिवसाला १०० टँकरने पाणी पुरवठा

दिवसाला १०० टँकरने पाणीपुरवठा
ठाणेकरांना आणखी चार दिवस पाणीटंचाई!
सकाळ वृत्तसेवा, ठाणे

ठाणे, ता. १५ शहराला पाणीपुरवठा करणाऱ्या पिसे जलशुद्धीकरण केंद्रातून येणारी मुख्य जलवाहिनी वारंवार फुटत असल्यामुळे ठाणेकरांना पाणीटंचाईच्या तीव्र झळा सोसाव्या लागत आहेत. दुरुस्तीनंतर पाणीपुरवठा सुरळीत होण्याची अपेक्षा असताना, जलवाहिनीला पुन्हा गळती लागल्याचे समोर आले आहे. यामुळे ठाणेकरांना १९ डिसेंबरपर्यंत म्हणजेच आणखी चार दिवस ५० टक्के पाणीकपातीचा सामना करावा लागणार आहे.

पिसे बंधाऱ्यातून टेमघर जलशुद्धीकरण केंद्राकडे पाणी वाहून नेणारी १००० मिमी व्यासाची जलवाहिनी १० दिवसांमध्ये दुसऱ्यांदा फुटली आहे. यामुळे आधी ३० टक्के आणि आता ५० टक्के पाणीकपात ठाणे महापालिकेकडून लागू करण्यात आली आहे. ठाणे महापालिकेच्या स्वत:च्या पाणीपुरवठा योजनेतील कल्याण फाटा येथील जलवाहिनी १० दिवसांपूर्वी फुटली होती. जुनी आणि प्रिस्ट्रेस काँक्रीट पद्धतीची ही जलवाहिनी तीन दिवसांनंतर दुरुस्त झाली, मात्र लगेचच दुसऱ्या ठिकाणी बिघाड झाल्याने पाणीकपात वाढवावी लागली.

टँकरवर वाढला ताण
पाणीकपातीची झळ आता अधिक तीव्र होऊ लागली आहे. नवे ठाणे म्हणून ओळखल्या जाणाऱ्या घोडबंदर भागाला आधीच पाणी अपुरे पडत होते. त्यात ५० टक्के कपातीने भर टाकल्यामुळे येथील बहुतेक गृहसंकुलांना दररोज तीन ते चार टँकर मागवावे लागत आहेत.

खर्चात वाढ
पाणीकपात सुरू झाल्यामुळे टँकरचा हा खर्च दुपटीने वाढला असल्याची तक्रार नागरिक करत आहेत. ठाणेकरांची पाण्याची गरज भागविण्यासाठी पालिका प्रशासनाला मोठी कसरत करावी लागत आहे. पूर्वी दररोज ८० ते ८५ टँकर लागत होते, मात्र आता त्यात वाढ होऊन प्रतिदिन ९० ते १०० टँकरने पाणीपुरवठा करण्यात येत असल्याची माहिती पालिका सूत्रांनी दिली.