श्रमिक नगर झोपडपट्टीवर कारवाईची शक्‍यता

श्रमिकनगर झोपडपट्टीवर कारवाईची शक्‍यता
हायकोर्टाच्या आदेशामुळे झोपडीधारकांमध्ये भीतीचे वातावरण
तुर्भे, ता. १६ (बातमीदार) : नवी मुंबई महापालिका क्षेत्रातील श्रमिकनगर झोपडपट्टी हटवण्याची तयारी प्रशासनाने सुरू केल्याची माहिती समोर आली आहे. मुंबई उच्च न्यायालयाच्या आदेशानुसार येत्या १९ डिसेंबर रोजी कारवाई होण्याची शक्यता आहे, मात्र या कारवाईबाबत प्रशासनाकडून अद्याप कोणतीही लेखी नोटीस देण्यात आलेली नसल्याचा दावा झोपडीधारकांकडून करण्यात येत आहे.
नवी मुंबई महापालिकेच्या २००१ च्या सर्वेक्षणानुसार श्रमिकनगर झोपडपट्टीत एकूण ६०९ झोपडीधारक असल्याची नोंद आहे. यापैकी १६८ झोपडीधारकांचे वाल्मिकी निवास योजनेअंतर्गत पुनर्वसन करण्यात आले असून, उर्वरित ४४१ झोपडीधारकांचे पुनर्वसन अद्याप झालेले नाही. प्रशासनाच्या माहितीनुसार, पुनर्वसन झाल्यानंतरही काही झोपडीधारक वादग्रस्त भूखंडावर अतिक्रमण करून वास्तव्यास असल्याने त्यांना निष्कासित करण्याचे आदेश मुंबई उच्च न्यायालयाने दिले आहेत, मात्र श्रमिक नगरमधील नागरिकांचे म्हणणे आहे की, उच्च न्यायालयात दाखल याचिकेबाबत तसेच कारवाईच्या स्वरूपाबाबत त्यांना कोणतीही अधिकृत माहिती देण्यात आलेली नाही. संपूर्ण झोपडपट्टी तोडली जाणार, अशी अफवा पसरल्याने परिसरातील नागरिकांमध्ये तीव्र भीतीचे वातावरण निर्माण झाले आहे. कारवाईपूर्वी प्रशासनाने केवळ वादग्रस्त १६८ झोपडीधारकांना लेखी नोटीस द्यावी, तसेच संबंधित झोपडीधारकांची यादी श्रमिकनगर परिसरात सार्वजनिक ठिकाणी लावावी, अशी मागणी स्थानिक नागरिकांकडून केली जात आहे. त्यामुळे अनावश्यक गैरसमज टळतील आणि कायदेशीर झोपडीधारकांवर अन्याय होणार नाही, असे नागरिकांचे म्हणणे आहे.
.......................
लोकप्रतिनिधींचा कानाडोळा
दरम्यान, नवी मुंबई महापालिका निवडणुकीच्या पार्श्वभूमीवर इच्छुक उमेदवारांकडून केवळ राजकीय आश्वासने दिली जात असून, प्रत्यक्ष मदतीसाठी कोणीही पुढे येत नसल्याची नाराजी झोपडीधारक व्यक्त करत आहेत. पालकमंत्री, संपर्कमंत्री, खासदार, आमदार तसेच माजी नगरसेवकांनीही श्रमिकनगरच्या प्रश्नाकडे दुर्लक्ष केल्याचा आरोप नागरिकांकडून करण्यात येत आहे. प्रशासन नेमकी कोणावर कारवाई करणार, पुनर्वसन न झालेल्या झोपडीधारकांचे भवितव्य काय, याबाबत स्पष्ट भूमिका मांडण्याची मागणी आता जोर धरू लागली आहे.