पालिकेची जलवाहिनी उघड्यावर

पालिकेची जलवाहिनी उघड्यावर
स्थानिकांसह प्रवासी, वाहनचालक हैराण
कांदिवली, ता. १६ (बातमीदार) ः कांदिवली पूर्व ठाकूर कॉम्प्लेक्स शिवम सुंदरम हॉटेलच्या गेटसमोर आर दक्षिण जलकामे विभागाने नवीन जलवाहिनी टाकली आहे. रहदारीच्या मुख्य मार्गांवर टाकण्यात आलेली दोन इंचाची जलवाहिनी उघड्यावर असल्याने वाहनचालकांना तारेवरची कसरत करतच मार्गक्रमण करावे लागत आहे.
अपघात होण्याची दाट शक्यता निर्माण झाली आहे. पालिकेने तातडीने जलवाहिनी जमिनीखाली गाडून डांबरीकरण करावे, अशी मागणी प्रवासी आणि वाहनचालकांमध्ये जोर धरू लागली आहे. ठाकूर कॉम्प्लेक्स, शिवम सुंदरम हॉटेलच्या बाजूला गंगानगर झोपडपट्टी विभागातील पाणी समस्या सोडवण्यासाठी जुनी जलवाहिनी काढून नव्याने दोन इंचाची जलवाहिनी टाकण्यात आली आहे.
पदपथाच्या बाजूला रस्त्यावर खड्डा खोदून टाकलेली जलवाहिनी काम पूर्ण झाल्यानंतर तशीच ठेवण्यात आली आहे. विशेष म्हणजे खोदण्यात आलेला मुख्य मार्ग पुढे दृतगती मार्गाला मिळतो. यामुळे या मार्गावर मोठ्या प्रमाणात वाहतूक असते. नव्याने जलवाहिनी चर खोदून टाकण्यात आली असून, लगत दोन दुसऱ्या जलवाहिन्या आणि केबल आहेत. दुसऱ्या बाजूला लोखंडी बॅरिकेड लावण्यात आले आहे. त्‍यामुळे मार्ग अरुंद झाल्याने गर्दीच्या वेळेत वाहनचालक विशेषतः दुचाकीस्वारांना आणि प्रवाशांना खोदलेल्या खड्ड्यातून दगड मातीतून मार्गक्रमण करावे लागत आहे. विस्कळित झालेल्या दगडाच्या मार्गातून जाताना ज्‍येष्ठ नागरिक, महिलांना नाहक त्रास सहन करावा लागत आहे.

मुख्य मार्गावर जलवाहिनीचे काम पूर्ण झाल्यानंतर तातडीने डांबरीकरण करून वाहतुकीस मार्ग खुला केला पाहिजे. अपूर्ण स्थितीत काम असल्याने नाहक त्रास सर्वांनाच होत आहे.
- गणेश पावडे सामाजिक कार्यकर्ते
लवकरात लवकर जलवाहिनीवर डांबरीकरण करून मार्ग व्यवस्थित खड्डेमुक्त केला जाईल.
- महेश चौगले,
अभियंता, जलकामे विभाग