पक्ष प्रवेशावरून कल्याणात भाजप - शिवसेना पुन्हा एकदा आमने सामने

भाजप-शिंदे गट पुन्हा आमने-सामने
अरुण व वंदना गीध यांच्या पक्षप्रवेशावरून युतीतील संघर्ष वाढला
कल्याण, ता. १६ (वार्ताहर) : पक्षप्रवेशावरून शिंदे गट आणि भाजपमधील वातावरण मध्यंतरी चांगलेच तापलेले होते, परंतु वरिष्ठ नेत्यांच्या मध्यस्थीने यावर पडदा पडल्याची चर्चा होती, मात्र पुन्हा एकदा कल्याणात हे दोन्ही पक्ष समोरासमोर आले आहेत. माजी नगरसेवक अरुण गीध आणि त्यांच्या भगिनी वंदना गीध यांनी सोमवारी (ता. १५) उपमुख्यमंत्री एकनाथ शिंदे यांच्या उपस्थितीत शिंदे गटात प्रवेश केला. यामुळे गीध यांचा प्रवेश कसा झाला, असा सवाल माजी आमदार नरेंद्र पवार यांनी केला आहे.
काही आठवड्यांपूर्वी एकमेकांचे पक्ष फोडण्याच्या मुद्द्यावरून संपूर्ण राज्यभरामध्ये शिवसेना आणि भाजपमधील वातावरण चांगलेच तापले होते. ज्याचे पडसाद थेट दिल्लीमध्येही उमटलेले दिसून आले. त्यानंतर मात्र दोन्ही पक्षांनी एकमेकांचे पदाधिकारी आणि नगरसेवक कार्यकर्त्यांना प्रवेश न देण्याचा निर्णय घेतला, मात्र हा शमलेला वाद आता पुन्हा सुरू होण्याची चिन्हे दिसून येत आहेत. एकनाथ शिंदे यांच्या उपस्थितीत अरुण गीध आणि त्यांच्या भगिनी वंदना गीध शिंदे गटात प्रवेश केला. या पक्षप्रवेशाबाबत एकनाथ शिंदे यांनी आपल्या समाजमाध्यमांवरून माहिती दिली.

भाजपकडून नाराजी
गीध बंधू-भगिनींच्या या पक्षप्रवेशावर भाजपकडून तीव्र शब्दांत नाराजी व्यक्त केली आहे. कल्याण पश्चिमेतील भाजपचे माजी आमदार नरेंद्र पवार यांनी शिंदे गटाच्या या दुहेरी भूमिकेचा निषेध व्यक्त केला. एकमेकांचे पदाधिकारी, नगरसेवक आणि कार्यकर्ते न घेण्याचा अलिखित करार दोन्ही पक्षांमध्ये झाल्याची आठवणही पवार यांनी या वेळी करून दिली. आमच्याकडेही शिंदे गटाचे कल्याण, डोंबिवली, उल्हासनगर, अंबरनाथ, बदलापूरचे अनेक नगरसेवक प्रवेश घेण्यासाठी रांगेत उभे आहेत. शिंदे गटाकडून अशाप्रकारे पाठित खंजीर खुपसण्याचे काम केले जाणार असेल, तर आम्हालाही भूमिका बदलावी लागेल, अशा तीव्र शब्दांत नरेंद्र पवार यांनी शिंदे गटाला सुनावले.