उल्हासनगर : वडिलांनी मुलींकडे दळण आणण्यासाठी 500 रुपये दिले. ते पडल्याने आणि शोधूनही सापडत नसल्याने वडील रागावतील या भीतीने निर्जनस्थळी 24 तास लपून बसलेल्या दोन अल्पवयीन बहिणींना उल्हासनगर गुन्हे अन्वेषणने शोधून काढले. त्यांना त्यांच्या पालकांच्या सुपूर्द करून वडिलांना फादर-डेची अनोखी गिफ्ट दिली आहे.

ही बातमी वाचली का? केडीएमसी निवडणुकीचे बिगुल वाजणार? निवडणूक आयोगाचे पालिकेला पत्र

अंबरनाथ पूर्वेला शिवाजीनगर पोलिस ठाण्याच्या हद्दीत राहणाऱ्या एका व्यक्तीने 20 तारखेला त्यांच्या दोन अल्पवयीन मुलींकडे पिठाच्या चक्कीमधून दळण आणण्यासाठी 500 रुपये दिले होते; पण हातातील पैसे पडल्याचे लक्षात आल्यावर त्यांनी शोध घेतला; पण पैसे सापडत नसल्याने आता वडील मारतील या भीतीने त्या घाबरल्या. भीतीपोटी दोन्ही बहिणींनी लपण्यासाठी काही अंतरावर असलेले निर्जन स्थळ गाठले. बराच वेळ झाला तरी मुली घरी आल्या नाहीत म्हणून वडिलांनी चक्की गाठली; पण त्या आल्याच नाही, असे सांगण्यात आल्यावर ते अस्वस्थ झाले. त्यांनी सर्वत्र विचारपूस चौकशी केली. शेवटी त्यांनी शिवाजीनगर पोलिस ठाण्यात तक्रार दाखल केली.

ही बातमी वाचली का? धक्कादायक! मुंबईत क्वांरटाईन सेंटरमध्ये मुलीवर विनयभंग करण्याचा प्रयत्न

मुलींचा शोध घेण्यासाठी शिवाजीनगर पोलिस ठाण्यासोबत उल्हासनगर गुन्हे अन्वेषणचे वरिष्ठ पोलिस निरीक्षक महेश तरडे, सहायक पोलिस निरीक्षक एस. ए. फडोळ, हवालदार जाधव, पोलिस नाईक वाघमारे, नवनाथ कोरडे, दादा भोसले आदी टीमने कंबर कसली. एखाद-दोन किलोमीटरच्या अंतरावर असलेल्या जंगल व निर्जन स्थळावर शोधाशोध केल्यावर एका मोठ्या खड्ड्यामध्ये दोन्ही बहिणी लपून बसल्या होत्या. पोलिसांना बघून त्या घाबरल्या. पोलिसांनी त्यांना आपुलकीने जवळ घेऊन पाणी पाजले. शिवाजीनगर पोलिस ठाण्याकरवी त्यांना त्यांच्या पालकांच्या सुपूर्द केले.