Pravin Darekar : हिंदुत्वाविषयी बोलण्याचा ठाकरे यांना अधिकार नाही

मुंबई - हिंदुवाद गुंडाळून विरोधी विचारधारा असणाऱ्या काँग्रेससोबत गेलेल्या उद्धव ठाकरे यांनी हिंदुत्व, देश-धर्माविषयी बोलण्याचा नैतिक अधिकारच गमावला आहे, अशी टीका भाजपचे विधान परिषदेतील गटनेते प्रवीण दरेकर यांनी आज येथे केली.

ठाकरे गटाचे खासदार संजय राऊत यांनी राममंदिराबाबत केलेल्या विधानांचा आज दरेकर यांनी खरपूस समाचार घेतला. आपल्या देवदैवतांच्या बाबतीत उद्धव ठाकरेंच्या शिवसेनेने काय भुमिका घेतलीय हे सर्वश्रुत आहे. तर संजय राऊत हे वैफल्याने ग्रासलेले आहेत, अशी टीकाही दरेकर यांनी केली.

दरेकर यांनी काँग्रेस नेते राहुल गांधींनाही लक्ष्य केले. ते म्हणाले की, राहुल गांधी निष्प्रभ आहेत, त्यांचा प्रभाव पडणार नाही. त्यांनी कितीही सभा, यात्रा घेवो, मात्र या देशातील जनतेने ठरवले आहे की, पंतप्रधान नरेंद्र मोदींनी पुन्हा एकदा या देशाचे नेतृत्व करावे.

कारण गेल्या दहा वर्षांत पंतप्रधान मोदींनी ज्या उंचीवर देशाला नेले आहे ते देशाची जनता पाहत आहे. पंतप्रधान मोदींच्या तुलनेत राहुल गांधी आजूबाजूलाही पोहोचू शकत नाही एवढं उत्तुंग आणि या देशातील जनतेसाठी विश्वासार्ह नेतृत्व म्हणून पंतप्रधान मोदी आज प्रस्थापित झालेले दिसत आहेत.