Mumbai Local: लोकलमध्ये किळसवाणे कृत्य! महिलांच्या डब्ब्यात पाहत मनोरुग्णाचे अश्लील चाळे, घटनेचा व्हिडिओ व्हायरल

नालासोपारा : मुंबईकरांची जीवनवाहिनी म्हणून ओळखली जाणाऱ्या मुंबई लोकलबाबत सातत्याने नवनवीन अपडेट समोर येत असतात. लोकलमधून दररोज लाखो प्रवासी प्रवास करत असून अनेकदा ट्रेनमध्ये मारामारी, स्टंटबाजी, भांडण असे अनेक व्हिडिओ समोर येतात. अशातच आता लोकलमध्ये मनोरुग्ण महिलांच्या डब्ब्यात पाहत अश्लील चाळे करत असल्याचा व्हिडिओ समोर आला आहे.

पश्चिम रेल्वेच्या विरार-दादर लोकलमध्ये एक मनोरुग्ण स्टंटबाजी करीत महिला डब्याकडे पाहात अश्लील वर्तन केल्याचा एक धक्कादायक व्हिडिओ समाजमाध्यामांवर व्हायरल होत आहे. ही घटना गुरुवारी (ता. ११) सायंकाळी सहा वाजता बोरिवली ते वांद्रा स्थानकादरम्यान घडल्याची माहिती वसई लोहमार्ग पोलिसांनी दिली.

लोकलच्या महिला डब्यामागील माल डब्यात हा मनोरुग्ण तरुण दरवाजात उभा राहून महिलांच्या डब्यात पाहात अश्लील शेरेबाजी करीत होता. या वेळी एका महिलेने या तरुणाचा हा व्हिडिओ काढला. सायंकाळच्या वेळेस चर्चगेटच्या दिशेने जाणाऱ्या लोकलमध्ये तुरळक गर्दी असते. मिरा रोड स्थानक गेल्यानंतर महिला डब्याशेजारी असलेल्या माल डब्यात माथेफिरू तरुण चढला होता.

त्यानंतर तरुणाने महिलांच्या डब्यात डोकावून अश्लील शेरेबाजी करायला सुरुवात केली. धावत्या लोकलमध्ये खिडकीतून महिलांना पाहून हा माथेफिरू अश्लील हावभाव करीत होता. त्यानंतर या तरुणाने रागारागाने लोकलच्या डब्याच्या पत्र्यावर जोरजोराने बुक्के मारल्याचे या व्हिडिओमध्ये दिसत आहे. या घटनेचा व्हिडिओ व्हायरल होत आहे.

एका महिलेने शुट केलेला व्हिडिओ फेसबुक आणि इंस्टाग्राम सोशल मीडिया प्लॅटफॉर्मवर पोस्ट केला. रेल्वे डब्यातील प्रवाशांकडील चौकशीत तो तरुण मनोरुग्ण असल्याचे समोर आले. दरम्यान, या प्रकरणाबाबत महिलेने कोणतीही तक्रार केली नसून पोलीस या प्रकरणाचा अधिक तपास करीत आहेत.