मुंबई : महाविकास आघाडीचे शिल्पकार शरद पवार राज्य सरकारला मार्गदर्शन करत असतील, तर पोटात दुखायचे कारण काय? असा थेट सवाल राष्ट्रवादी कॉंग्रेसचे प्रदेश प्रवक्ते महेश तपासे यांनी विरोधी पक्षनेते देवेंद्र फडणवीस यांना केला आहे. 

"भाजपा नेत्यांनी पोकळ गप्पा मारण्यापेक्षा केंद्रातून मदत आणण्यासाठी प्रयत्न करावा"

कर्ज काढणे हे पाप नाही, परंतु राज्याचा जीएसटीचा हक्काचा 28 हजार कोटींचा परतावा राज्याला न देणे हे निश्‍चितच पाप आहे. हक्काचा परतावा राज्याला परत मिळण्यासाठी विरोधी पक्षनेते प्रयत्न करणार का? आणि केले का, असा सवाल करतानाच पाप आणि पुण्याची परिभाषा देवेंद्र फडणवीस यांनी शरद पवार यांना समजावू नये, असा सल्लाही महेश तपासे यांनी दिला. 

जयंत पाटलांनी देवेंद्र फडणवीसांना सुनावलं, "थिल्लरपणा करू नये" कमेंटवर दिलं रोखठोक उत्तर

गुजरातमध्ये भूकंप झाला त्या वेळी गुजरात व केंद्रात भाजपचे सरकार होते. तरीसुद्धा भूकंपपीडितांना मदत करू शकले नाहीत. तत्कालीन पंतप्रधान अटलबिहारी वाजपेयी यांनी त्या वेळी व्यवस्थापन समितीचे उपाध्यक्ष शरद पवार यांना केले होते, तो सरकारचा नाकर्तेपणा होता का, असा खोचक सवालही तपासे यांनी केला. देशात अनेक कृषिमंत्री झाले; मात्र एकमेवाद्वितीय कृषिमंत्री शरद पवार राहिले आहेत. ज्यांनी शेतकऱ्यांच्या हिताचे अनेक निर्णय घेतले आणि त्याचा थेट फायदा शेतकऱ्यांना झाला. यंदाच्या अतिवृष्टीमुळे शेतकऱ्यांचे अतोनात नुकसान झाले असून त्यांना सरकार वाऱ्यावर सोडणार नाही. त्यांच्यासाठी जे जे काही करता येईल, ते महाविकास आघाडी करेल याची आठवणही महेश तपासे यांनी फडणवीस यांना करून दिली आहे. 
----------------------------------
(संपादन : गोरक्षनाथ ठाकरे)