वाढदिवसाचे सेलिब्रेशन करताना तरूण भाजला; अंबरनाथमधील घटना

मुंबई : आपल्यापैकी अनेक जण रस्त्यावर रात्रीच्यावेळी वाढदिवस साजरे करणारे घोळके बघत असतो. अनेकदा या मुलांकडून वाढदिवस साजरा करण्यासाठी नवनवीन शक्कल लढवल्या जातात. मात्र, काही वेळा नको ते प्रकार करणे किती महागात पडू शकते हे समोर आणणारा प्रकार अंबरनाथमधून समोर आला आहे. वाढदिवसाचे सेलिब्रेशन करताना तोंडात जळती मेणबत्ती पकडण्याने बर्थडे बॉय होरपळल्याचा धक्कादायक प्रकार समोर आला आहे.

याबाबत अधिक माहिती अशी की, अंबरनाथमधील एका मुलाचा वाढदिवस होता. यासाठी बर्थडे बॉयचे काही मित्र सेलिब्रेशनसाठी एकत्र जमले होते. त्यावेळी ज्या मुलाचा वाढदिवस होता त्याने तोंडात जळती मेणबत्ती पकडली आणि मात्र असे करणे या मुलाला चांगलेच महागात पडले आहे. संबंधित मुलागा त्याच्या मित्रांसोबत वाढदिवस साजरा करत होता. त्यावेळी त्याने त्याच्या तोंडात मेणबत्ती पकडली होती. त्याचवेळी या मुलाच्या मित्राने त्याच्या अंगावर पीठ टाकले आणि त्यामुळे एकदम आगीचा भडका उडाला.

याघटनेत संबंधित मुलाचे कपडे जळाले असून तो किरकोळ जखमी झाल्याचे समजत आहे. घटनेनंतर मुलावर खासगी रूग्णालयात उपाचार करून त्याला घरी सोडण्यात आले आहे. त्यामुळे वाढदिवसाचे सेलिब्रेशन करताना अशा प्रकारे चुकीचे प्रयोग करणाऱ्यांनी यातून धडा घेणे गरजेचे आहे. अन्यथा एखादा मोठा अपघात एखाद्याच्या जीवाशी महागात पडू शकतो.