नांदेड - ग्रामीण व शहरी भागातील थेट घरपोच सिलेंडरसाठी आता किरकोळ विक्री किंमती प्रमाणेच दर द्यावेत, असे स्पष्ट करून जिल्हाधिकारी डॉ. विपीन यांनी ग्राहकांना दिलासा दिला आहे. गॅसच्या निर्धारित किंमतीमध्ये सर्व रक्‍कम आकारलेली असल्‍याने ग्राहकांनी कोणताही अतिरिक्‍त शुल्‍क देऊ नये, असे त्यांनी आदेशाद्वारे स्पष्ट केले आहे.
कोणत्‍याही गॅस वितरकांनी ठरवुन दिलेल्‍या किंमतीपेक्षा जास्त दराने गॅस सिलेंडरची विक्री केल्यास त्यांची तक्रार संबंधित तहसील कार्यालय पुरवठा विभागात तसेच जिल्‍हा पुरवठा कार्यालय येथे लेखी तक्रार करावी, असे आदेशात नमूद केले आहे. नांदेड जिल्‍‍ह्यात कार्यरत भारत पेट्रोल कॉर्पेरिशन, हिंदुस्‍तान पेट्रोल कॉर्पेरिशन, इंडियन पेट्रोल कॉर्पेरिशन या कंपन्‍याच्‍या वितरकाव्‍दारे गॅस वितरण चालु आहे. ऑईल अॅंड नॅचरल गॅसतर्फे सर्व कंपन्‍यांना दर देण्‍यात आले आहेत.
असे मिळणार एजन्सीला पैसे
घरगुती वापराच्‍या १४.२ किलो प्रति गॅस सिलेंडरसाठी संबंधित गॅस एजन्सीला ६५ रुपये एवढे कमीशन मंजुर केले आहे. त्‍यात त्‍या संबंधित गॅस एजन्‍सीसाठी ३६ रुपये आस्‍थापना खर्चासाठी व २९ रुपये एवढी रक्‍कम त्‍यांना वाहतुकीसाठी मंजुर केलेली आहे. तसेच पाच किलो प्रति गॅस सिलेंडरसाठी संबंधित गॅस एजन्सीला ३२.०५ रुपये एवढे कमीशन मंजुर केले आहे. त्‍यात त्‍या संबंधित गॅस एजन्‍सीसाठी १८ रुपये आस्‍थापना खर्चासाठी व १४.०५ रुपये एवढी रक्‍कम त्‍यांना वाहतुकीसाठी मंजुर केली आहे. तसेच अतिरिक्‍त वाहतुक दर हे काढून टाकण्‍यास सुचीत करण्‍यात आले आहे.
अतिरिक्‍त चार्ज लावू नये
जर गोडावुनमधुन गॅस सिलेंडर घेतले किंवा खरेदी केला जात असेल तर गॅस एजन्‍सीने १४.२ किलोच्‍या गॅस सिंलेडरसाठी २९ रुपये आणि पाच किलोसाठी १४ रुपये ५० पैसे असे डिलेव्‍हरी चार्जेस आकारु नयेत. संबंधित गॅस वितरकांच्‍या कार्यक्षेत्राबाहेरील ग्राहक असल्यास त्यांनी ते स्‍वत:हून त्‍यांच्‍या सीमा क्षेत्राबाहेरील दुसऱ्या नजीकच्‍या गॅस वितरकांच्‍या ग्राहकांना जोडावे. जेणेकरुन ग्राहकांना वाहतुकीच्‍या खर्चाचा भुर्दंड पडणार नाही. जिल्ह्यातील सर्व गॅस ग्राहकांना किरकोळ विक्री किंमत (आरएसपी) दराव्‍यतिरिक्‍त कोणताच अतिरिक्‍त चार्ज लावू नये. तसेच संबंधित गॅस वितरकांनी गॅस सिलेंडरची विक्री (आरएसपी) दरातच विक्री करणे बंधनकारक आहे.
जास्त पैसे घेतल्यास कारवाई
जिल्ह्यातील ग्रामीण भागातील कोणत्‍याही गॅस वितरकांनी पेट्रोलियम मंत्रालयाकडुन वेळोवेळी घोषित होणाऱ्या सेल रिटेल प्राइसप्रमाणे गॅस सिलेंडरची विक्री करणे बंधनकारक आहे. कोणत्‍याही गॅस वितरकांनी त्‍यांना ठरवून दिलेल्‍या किंमतीपेक्षा जास्त दराने गॅस सिलेंडरची विक्री केल्‍याची तक्रार असल्यास संबंधित तालुक्‍याचे तहसील कार्यालयातील पुरवठा विभाग तसेच जिल्‍हा पुरवठा कार्यालय येथे लेखी तक्रार करावी. या तक्रारीमध्‍ये चौकशी अंती तथ्‍य आढळल्‍यास व ते निष्‍पन्‍न झाल्‍यास त्‍याच्‍याविरुध्‍द जीवनावश्‍यक वस्‍तु कायद्यातील तरतुदींच्‍या अनुषंगाने कारवाई करण्‍यात येईल, असेही जिल्हाधिकारी डॉ. विपीन यांनी स्पष्ट केले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.