प्रशासनाला ‘त्या’ २३ चालकांच्या अहवालाची प्रतिक्षा

नांदेड : ‘लॉकडाउन’मध्ये नांदेड येथे अडकुन पडलेल्या पंजाबच्या यात्रेकरूस सोडण्यासाठी गेलेल्या जिल्ह्यातील २३ चालक परतल्यानंतर त्यांच्या घशातील स्वॅब ‘कोरोना’ चाचणीसाठी घेण्यात आले आहेत. त्याचा नमुना अहवाल येणे अजून बाकी असतानाच शनिवारी (ता.दोन) जिल्ह्यात नव्याने २० रुग्ण आढळुन आले आहेत. त्यामुळे पंजाबला गेलेल्या ‘त्या’ २३ चालकांचे अहवाल निगेटिव्ह की पॉझिटिव्ह येणार याकडे जिल्हा प्रशासन बारीक लक्ष ठेवून आहे.
 
दोन दिवसांपूर्वी श्री गुरुद्वारा लंगर साहिब परिसरातील ९७ व्यक्तींचे ‘स्वॅब’ तपासणीसाठी घेण्यात आले होते. यातील २० जणास ‘कोरोना’ची लागण, तर २५ ‘कोरोना’मुक्त आणि ११ व्यक्तींचा नमुना अहवाल अनिर्णीत अवस्थेत ठेवण्यात आले असले तरी, ९७ पैकी ४१ व्यक्तींचे अहवाल अद्याप प्राप्त झालेले नाहीत. त्यामुळे ‘कोरोना’ रुग्णांची संख्या वाढण्याची शक्यता तज्ज्ञ डॉक्टर यांच्याकडून वर्तविली जात आहे. 

हेही वाचा- Video : बेभान ! नांदेडकर कधी येणार भानावर ?

शनिवारी संध्याकाळपर्यंत अहवाल  होण्याची शक्यता
जिल्हाधिकारी विपीन इटनकर यांनी शनिवारी (ता.दोन) मे सकाळपासून पुढच्या प्लॅनिंगसाठी जिल्हाप्रशासनाच्या बैठका सुरु केल्या आहेत. नांदेडहुन पंजाबला खुराणा ट्रॅव्हल्समार्फत २३ बस गेल्या होत्या. यामध्ये सचखंड गुरुद्वारा येथून दहा तर लंगर साहिबमधून १३ असे एकुण २३ बस गेल्या होत्या. त्यासर्व गाड्यांचे चालक नांदेडला दाखल होताच त्यांना गावाबाहेर थांबवून त्यांची आरोग्य तपासणी करण्यात आली होती. त्यानंतर त्यांना रुग्णालय क्वारंटाइनमध्ये ठेवण्यात आले आहे. त्यांचे अहवाल शनिवारी संध्याकाळपर्यंत प्राप्त होण्याची शक्यता वर्तविली जात आहे. नांदेड जिल्ह्यात ‘कोरोना’ बाधीतांची संख्या वरचेवर वाढत असल्याने प्रशासन चांगलेच हादरले आहे. 

महापालिकेच्या हद्दीत रोज हजारो संशयित रुग्णांची तपासणी करण्यात येत आहे. यातील काही लोकांचे स्वॅब घेऊन चाचणीसाठी प्रयोगशाळेत पाठविण्यात येत आहेत. त्यातून रोज नव्याने धक्काधादक आकडेवारी पुढे येत आहे. 

हेही वाचा- Nanded Breaking : गुरुद्वारा लंगर साहिब परिसरातील २० कर्मचारी पॉझिटिव्ह, रुग्णांची संख्या २६

 २४ ‘कोरोना’ बाधीतावर उपचार सुरु
शनिवारी (ता.दोन) सकाळी एक हजार २३५ संशयितांची नोंद करण्यात आली आहे. यातील एक हजार १२० पैकी एक हजार नऊ जणांचा अहवाल निगेटिव्ह आला आहे. तर ५६ संशयितांचे स्वॅब अहवाल येणे अजून बाकी आहे. तर १४ जणांचा अहवाल अनिर्णित आहे. जिल्ह्यातील २६ कोरोना बाधीत रुग्णांपैकी दोघांचा मृत्यू झाला असून सध्या २४ ‘कोरोना’ बाधीतावर उपचार सुरु आहेत.