भाजपमुळे लोकशाही व देश धोक्यात- डाॅ प्रा. यशपाल भिंगे 

अर्धापूर ( जिल्हा नांदेड ) : देशातील स्वायत्त संस्था, लोकशाही व देश भाजपमुळे धोक्यात आला आहे. देशात जाती धर्मात भांडणं लावून सत्ता प्राप्त करण्याचा खेळ सुरु आहे. देशातील शेतकरी तीन काळे कायदे रद्द करण्यासाठी रस्त्यावर येऊन शंभर दिवस झाले तरी मोदी सरकार शेतकऱ्यांच्या मागण्या मान्य करित नाही ही गंभीर बाब आहे. तरुणांनी धर्मनिरपेक्ष विचार बळकट करण्यासाठी राष्ट्रवादी काॅग्रेसच्या झेंड्याखाली एकत्र येऊन देश मजबूत करावा असे आवाहन राष्ट्रवादी काॅग्रेसचे डाॅ यशपाल भिंगे यांनी अर्धापूर येथे शुक्रवारी (ता. १२) केले.

शहरातील जम- जम मंगल कार्यालयात पक्षप्रवेश सोहळा आयोजित करण्यात आला होता. तालुक्यातील बारसगाव, येळेगाव आदी गावातील शेकडो तरुण कार्यकर्त्यांनी आत्माराम कपाटे यांच्या नेतृत्वाखाली राष्ट्रवादी काॅग्रेसमध्ये प्रवेश केल्यानंतर एका छोट्याखानी सभेचे आयोजन करण्यात आले होते. या सभेच्या अध्यक्षस्थानी आनंद पाटील होते. तर प्रमुख पाहुणे म्हणुन राष्ट्रवादी काॅग्रेसचे माजी तालुका अध्यक्ष शशिकांत पाटील क्षिरसागर, चंद्रकांत टेकाळे, शेख साबेर,संदीप राऊत आदी उपस्थित होते.

हेही वाचा -  परभणी शहरात संचारबंदी नावालाच ; रस्त्यावर नागरीकांचा सर्रास वावर, पोलिसांकडून पत्रकारांना मारहाण

आत्माराम कपाटे यांनी आपल्या पक्ष प्रवेशाबाबतची भूमिका स्पष्ट करतांना सांगितले की, भाजपने भुरळ पाडल्याने पक्ष सोडून भाजपत प्रवेश केला होता.पण गेल्या दोन वर्षात भ्रमनिरास झाल्याने पुन्हा राष्ट्रवादीत प्रवेश केला आहे. येणाऱ्या स्थानिक स्वराज्य संस्था निवडणुकीत राष्ट्रवादीचे जास्तीत जास्त उमेदवार निवडून आणण्यासाठी प्रयत्न करणार असे कपाटे यांनी सांगितले. तर आनंद पाटील यांनी राज्यात महाविकास आघाडीचे सरकार आहे. काॅग्रेसने जिल्ह्यातील आगामी निवडणुकीत घेतले तर सोबत जाऊ नाही तर स्वतंत्र निवडणूका लढवून पक्षाला यश मिळवून देण्यासाठी सज्ज आहे. यावेळी शहरासह तालुक्यातील राष्ट्रवादी काॅग्रेसचे पदाधिकारी ,कार्यकर्ते मोठ्या संख्येने उपस्थित होते. या कार्यक्रमाचे सुत्रसंचलन शशिकांत पाटील क्षिरसागर यांनी केले.

संपादन- प्रल्हाद कांबळे