नांदेड : अवैध दारु विक्री करणाऱ्यांवर कारवाई, सहा लाखाचा मुद्देेमाल जप्त- निलेश सांगडे

नांदेड : राज्य उत्पादन शुल्क विभागाकडून जिल्हाभरात अवैध देशी, हातभट्टी विक्री करणाऱ्यांविरुद्ध धडक मोहीम राबविण्यात आली. पथकांनी वेगवेगळ्या ठिकाणी कारवाया करुन लाखोंचा मुद्देमाल जप्त करण्यात आला. यावेळी जवळपास दहा आरोपींना अटक केली. त्यांच्याविरुद्ध गुन्हा दाखल करण्यात आला आहे. ह्या कारवाया नांदेड शहर व परिसरात नविन वर्षाच्या पूर्वसंध्येवर करण्यात आल्या. 

राज्य उत्पादन शुल्क विभागाचे अधीक्षक निलेश सांगडे यांच्या मार्गदर्शनाखाली जिल्हाभरात विविध ठिकाणी कारवाया करण्यात आल्या. यावेळी पथकांनी अवैध देशी, हातभट्टी, रसायन, वाहने असा पाच लाख ८५ हजाराचा मुद्देमाल जप्त केला. यावेळी अवैध दारु विक्री करणाऱ्या दहा जणांना अटक केली. काही जण मुद्देमाल सोडून पसार झाले. या सर्वांविरुद्ध गुन्हा दाखल करण्यात आला आहे.

हेही वाचा - नांदेड महापालिकेत ‘स्थायी’च्या सभापतीपदी विरेंद्रसिंग गाडीवाले 

पथकात यांनी घेतले परिश्रम

निरिक्षक एस. एस. खंडेराय, एस. बी. चौधरी, भगवान मंडलवार, ज्योती गुट्टे, मोहमद रफी, व्ही. बी. मोहाळे, पीड. जी. कदम, पी. बी. टकले, व्ही. टी. खिल्लारे, जवान आर. बी. फाळके, एस. ए. नंदगावे, एम. टी. सुरनर, एन. पी. भोकरे, एस. जी. संगेवार, पी. पी. इंगोले, एम. यु. अनकांडे, परमेश्वर नांदुसेकर, अमोल राठोड, दिलीप नारखेडे विकास नागमवाड, जी. व्ही. भालेराव, के. के. किरतवाड, आर. एस. बोदमवाड यांचा समावेश होता.

नविन वर्ष घरीच राहून साजरे करा

नववर्ष दिनाच्या पार्श्वभूमीवर जिल्ह्यात कुठेही अवैध मद्याची निर्मिती, विक्री व वाहतूक होऊ नये याकरीता राज्य उत्पादन शुल्क विभागामार्फत चार विशेष भरारी पथकांची स्थापना करण्यात आली. ता. 14 डिसेंबरपासून सदर पथके दिवसरात्र त्यांना नेमून दिलेले कामकाज करीत आहेत. संशयित वाहनांची तपासणी करणे, सराईत गुन्हेगारांवर नजर ठेवणे, तसेच अवैध मद्याबाबत कारवाया करण्याचे काम या पथकांनी केलेले आहे. तसेच नांदेड जिल्ह्यामध्ये कारला फाटा बिलोली व देगलूर येथे देखील चेक पोस्ट उभे करुन उपनिरीक्षक दर्जाच्या अधिकाऱ्यांच्या नेमणुका करण्यात आलेल्या आहेत.
सर्व नागरिकांना आवाहन करण्यात येते की गुरुवारी (ता. ३१) डिसेंबर आपण आपल्या घरीच साजरा करावा व प्रशासनाला सहकार्य करावे.
- निलेश सांगडे, अधीक्षक, राज्य उत्पादन शुल्क विभाग, नांदेड