नांदेडकरांनो आता तरी व्हा सावध! 

अभय कुळकजाईकर
Friday, 4 September 2020

नांदेडला वाढत जाणारी कोरोनाबाधितांची संख्या चिंतेचा विषय झाली आहे. गेल्या आठवड्याभरापासून रुग्णसंख्येचा आकडा दोनशेच्या वरच येत आहे. गुरूवारी (ता. तीन) तब्बल ४४३ तर शुक्रवारी (ता. चार) ३६२ रुग्ण कोरोना पॉझिटिव्ह आढळून आले. त्यामुळे आता नांदेडकरांना सावध रहावे लागणार आहे. विनाकारण रस्त्यावर आणि बाजारात गर्दी वाढल्याने कोरोनाचा संसर्ग आणखी वाढण्याची शक्यता नाकारता येत नाही.  

नांदेड - जिल्ह्यात गेल्या आठवडाभरापासून दररोज दोनशेपर्यंत स्थिरावलेला कोरोना रुग्णांचा आकडा आता चारशेवर पोचला आहे. गेल्या पाच महिन्यांच्या तुलनेत दिवसभरातील सर्वांत जास्त रुग्णसंख्या गुरुवारी (ता. तीन) तब्बल ४४३ नोंदली गेली तर शुक्रवारी (ता. चार) ३६२ रुग्ण कोरोना पॉझिटिव्ह आढळून आले. विविध विभागांत समन्वयाचा अभाव असल्याने आता नांदेडकरांना अधिक सावधानता बाळगावी लागणार आहे. 

नांदेडला सुरवातीच्या काळात जवळपास दीड महिना एकही कोरोना पॉझिटिव्ह रुग्ण आढळला नाही. एप्रिलच्या शेवटच्या आठवड्यापासून रुग्ण आढळायला सुरवात झाली. ता. चार सप्टेंबरपर्यंत एकूण पॉझिटिव्ह रुग्णांची संख्या आठ हजार २१२ वर गेली. उपचारानंतर त्यातील पाच हजार २०३ रुग्ण बरे झाले असून, त्यांना रुग्णालयांतून सुटी देण्यात आली आहे. सध्या विविध रुग्णालयांत दोन हजार ६९८ रुग्णांवर उपचार सुरू आहेत. त्यातील २७१ रुग्णांची प्रकृती गंभीर आहे. जिल्ह्यात आतापर्यंत २५७ जणांचा मृत्यू झाला आहे. 

हेही वाचा - Video : नांदेडमध्ये कोविड पॉझिटिव्ह विद्यार्थी ‘जेईई’च्या परिक्षेपासून वंचित

समन्वय ठेवत काम हवे
नांदेडला सुरवातीच्या काळात लॉकडाउनची अंमलबजावणी काटेकोरपणे झाली. जिल्हा प्रशासनासह पोलिस, महापालिका आणि इतर विभाग आणि त्यांच्या अधिकाऱ्यांनी समन्वय ठेवत काम केले. त्यामुळे कोरोना रुग्णांची संख्या फारशी नव्हती. रस्त्यावर किंवा बाजारातही फारशी गर्दी होत नव्हती. मात्र, नंतर हळूहळू लॉकडाउनचे टप्पे आणि सवलती मिळत गेल्या. त्याचबरोबर संबंधित विभाग आणि त्यांच्या अधिकाऱ्यांमधील समन्वय कमी होत गेला. कडक अंमलबजावणी हळूहळू शिथील होत गेली तसेच प्रतिबंधात्मक उपाययोजनांकडे नागरिकांचेही दुर्लक्ष होऊ लागले. त्यामुळे रस्ते आणि बाजारपेठेत गर्दी होऊ लागली. 

हेही वाचायलाच हवे - नांदेडला ३६२ जण शुक्रवारी पॉझिटिव्ह,  दिवसभरात सहा जणांचा मृत्यू; २०२ रुग्ण कोरोनामुक्त

गर्दी झाल्यास परिस्थिती अवघड
गेल्या दहा बारा दिवसांत गणेशोत्सव, गौरी, मोहरम आदी सणांच्या निमित्ताने नागरिकांनी बाजारपेठेत गर्दी केली. सकाळी नऊ ते रात्री सात वाजेपर्यंत जवळपास सर्वच व्यवहार सुरू झाले. त्यामुळे हळूहळू नागरिकांचीही कोरोना संसर्गाची भीती कमी होत गेली आणि त्याच्या परिणाम रुग्णसंख्या वाढीत दिसून येऊ लागला. गेल्या आठवडाभरापासून दररोज वाढत जाणारी रुग्णसंख्या लक्षात घेता आता नागरिकांना सावध व्हावे लागणार आहे. अशीच गर्दी वाढत गेली तर परिस्थिती आणखी अवघड होण्याची शक्यता नाकारता येत नाही. 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Nandedkars, be careful now!, Nanded news