बेटी बचावचा संदेश देत नवरीची गावातून मिरवणुक; अर्धापूरात चर्चा

अर्धापूर ( जिल्हा नांदेड ) : आपल्या पाल्याचा विवाह सोहळा भव्यदिव्य करण्याचे प्रत्येकाचे स्वप्न असते. तसेच जरा हटके व आठवणीत कसा राहिल यासाठी विविध शक्कल लढविली जाते. विवाह म्हंटले की मिरवणुक आलीच. पण ही मिरवणुक नवरदेवाची असते. सहसा नवरीची मिरवणुक काढण्यात येत नाही. पण याला अपवाद जिल्ह्यातील अर्धापूर शहर ठरले आहे. शहरातील फुले नगरातील स्वतंत्र सैनिक कुटुंबातील डाके परिवाराने आपल्या नवरीची मिरवणुक काढली तीही घोड्यावरुन. शहरातील प्रमुख रस्त्यावरुन सवाद्य मिरवणुक काढून मुलगा- मुलगी समान असते याचा संदेश या मिरवणुकीतून देण्यात आल्याने डाके कुटुंबाचे कौतुक होत आहे. तसेच बेटी बचाव बेटी पढाव या अभियानात चालना मिळाली आहे.

विवाह सोहळ्यात नवरदेवाची मिरवणुक ही अविभाज्य घटक. ही मिरवणुक आगळी- वेगळी करण्यासाठी प्रयत्न केला जातो. मिरवणुकीत घोडा, उघडी जीप, पालखी, तुतारी, भालादार, चौपदार याचा सोबत डीजे, आधुनिक तसेच पारंपरिक वाद्यांचा वापर केला जातो. अतिषबाजी केली जाते. पण हा सर्व आटापिटा नवरदेवाच्या मिरवणुकीसाठी. नवरीची मिरवणुक सभागृहात पालखीतून काढण्यात येते. याला अर्धापूर शहरातील डाके कुटूंब अपवाद ठरले आहे.

हेही वाचा - नांदेडकरांसाठी सरसावली ग्राहक पंचायत; ऑटोरिक्षा चालकांना बसणार वेसण? -

शहरातील फुलेनगरात बबन डाके राहतात. त्यांचे वडील नागोजी डाके हे स्वतंत्र सैनिक होते. त्यांनी हैदराबाद मुक्ती संग्रामात सहभाग नोंदविला होता.त्यांची नात श्रुतिका हिचा विवाह सागर जहिरव यांच्याशी गुरुवारी (ता. सात ) होणार आहे. लग्नाच्या पुर्वसंध्येला बुधवारी (ता. सहा ) सायंकाळी वधू- वराची मिरवणुक काढण्यात आली.

अर्धापूर शहरांत कुतूहल व कौतुकचा विषय

मारोती डाके यांचे जुने घर शहरातील जुन्या वस्तीतील रामनगर भागात आहे. या जुन्या घराच्या आठवणीला उजाळा मिळावा यासाठी वधू श्रुतिका व वर सागर अहिर यांची मिरवणुक रामनगर, मारुती मंदिर या मार्गांनी फुलेनगरातील नवीन घरी गेली व सांगता करण्यात आली. ही मिरवणुक अर्धापूर शहरांत कुतूहल व कौतुकचा विषय ठरला आहे. अशा प्रकारची नवरीची मिरवणुक प्रथमच काढण्यात आली आहे.

नांदेडच्या ताज्या व महत्वाच्या बातम्या

संपादन - प्रल्हाद कांबळे