नांदेड : महागाईला तेलाची फोडणी, गव्हाच्या दरातही वाढ

नांदेड : एकीकडे इंधनदर कडाडले असतानाच कोरोनामुळे बाहेरच्या देशांतून सूर्यफुल तसेच पाम तेलाची आयातही घटल्याने सोयाबीन तेलाला मागणी वाढली आहे. मागणीच्या तुलनेत पुरवठा घटल्याने दिवाळीपासून खाद्यतेलाच्या किमती सातत्याने वाढत आहेत. दिवाळीनंतर खाद्यतेल किलोमागे आठ ते दहा रुपयांनी महागल्याने सर्वसामान्यांचा महिन्याचा आर्थिक ताळेबंद बिघडला आहे.

दिवाळीदरम्यान सोयाबीन तेल १०२ ते १०३ रुपये लिटर होते. त्यात पाच ते सात रुपयांची वाढ झाली असून, ते १०७ ते ११० रुपयांपर्यंत गेले आहे. सूर्यफूल तेलातही किलोमागे दहा रुपयांची वाढ होऊन ते १२० ते १३० रुपयांपर्यंत गेले आहे. सूर्यफूल, तसेच सोयाबीन तेलाच्या पंधरा किलोच्या डब्यामागे शंभर ते सव्वाशे रुपयांनी वाढ झाली आहे. तेल ही प्रत्येक घरातील अत्यावश्यक गरज असल्यामुळे त्यासाठी महिन्याच्या बजेटमधील जास्त पैसे मोजावे लागत असल्याने किचनचा ताळमेळ बिघडला आहे. शेंगदाण्याच्या किंमतीही वधारल्याआहेत.

हेही वाचा - नांदेड जिल्ह्यात खरिपाची अंतिम पैसेवारी पन्नास पैशांच्याखाली
 

गव्हाच्या दरांतही वाढ
दिवाळीनंतर गव्हाच्या दरांतही किलोमागे दोन ते तीन रुपयांनी वाढ झाली आहे. मध्ये प्रदेशातून येणारा सिहोर, तसेच स्थानिक गहू दिवाळीत २० ते २२ रुपये होता, तो आता २४ ते २५ रुपये किलोप्रमाणे विकला जात आहे. 

चहाचा तजेलाही महागला
चहाचे उत्पादन कमी झाल्यामुळे त्याचे दरही प्रचंड वाढले आहेत. दिवाळीनंतर किलोमागे ४० ते ५० रुपये वाढ झाल्यामुळे चहाचा तजेला महागला आहे. गेल्या दोन तीन महिन्यांपासून चहाचे दर वाढतेच आहेत. दिवाळीदरम्यान सव्वाचारशे ते साडेचारशे रुपये किलोदरम्यान असलेला पॅकिंग चहा पाचशे रुपये किलोपर्यंत पोहोचला आहे. गणेशोत्सवात गगनाला भिडलेले कापराचे दर आता काहीसे खाली आले असून, तो हजार तु बाराशे रुपयांवर गेला आहे.

हे देखील वाचाच - नांदेड : मोबाईल शाॅपी फोडून, आपली मोबाईल शाॅपी चालविणारी टोळी जेरबंद, लाखोंचा ऐवज जप्त, भाग्यनगर पोलिसांची कारवाई

डाळींचे दर स्थिर
दिवाळीदरम्यान डाळीच्या दरात मोठी वाढ झाली होती. मात्र, त्यानंतर मागणी काहीशी कमी झाल्याने डाळींचे दर स्थिर आहेत. साखर, पोहे, साबुदाणा, रवा, हरभराडाळ, मूगडाळ आदींच्या दरांतही फारसा फरक पडलेला नाही. पॅकिंग खोबरेल तेल मात्र दोन रुपयांनी महागले आहे.