Nanded News : कुपोषितांसाठी विशेष अभियान ; नांदेड जिल्हा परिषद - मुंबई आयआयटीमध्ये सामंजस्य करार

नांदेड : जिल्हा परिषदेच्या महिला व बाल विकास आणि आरोग्य विभाग यांच्या माध्यमातून जिल्ह्यातील कुपोषित बालकांच्या पोषणासाठी विशेष मोहिम हाती घेण्यात येणार आहे. यासाठी आयआयटी मुंबईच्या आहारशास्त्र विभागाशी सामंजस्य करार करण्यात आला आहे. यातून नांदेड जिल्ह्यासाठी विशेष अभियान राबविण्यात येणार असल्याची माहिती जिल्हा परिषदेच्या प्रशासक तथा मुख्य कार्यकारी अधिकारी मीनल करनवाल यांनी दिली आहे.

जिल्हा परिषदेत रुजू झाल्यापासून विद्यार्थ्यांची गुणवत्तावाढ तसेच कुपोषण मुक्तीसाठी सीईओ करनवाल यांनी विशेष लक्ष दिले आहे. यासाठी शिक्षकांना वेध प्रशिक्षण दिले जात आहे. तर कुपोषणासाठी डॉ. ए. पी. जे. अब्दुल कलाम अमृत आहार योजनेतून आदिवासी भागातील गर्भवती मातांना सकस आहार देण्यावर भर दिला जात आहे.

यावर लक्ष ठेवण्यासाठी स्वतंत्र व्हाट्सअप ग्रुपही तयार करण्यात आला आहे. आता जिल्ह्यातील शून्य ते पाच वर्षे वयोगटातील बालकांच्या कुपोषण मुक्तीसाठी पाऊल उचलण्यात आले आहे. यासाठी त्यांनी आयआयटी मुंबई यांच्यासोबत सामंजस्य करारही करण्यात आला आहे.

पाच वर्षाखालील मुलांचे कुपोषण जास्त

बालकातील कुपोषण शोधण्यासाठी नॅशनल फॅमिली हेल्थ सर्वे दर पाच वर्षांनी करण्यात येतो. २०२० मध्ये झालेल्या सर्वेक्षणात नांदेड जिल्ह्यात वजनाप्रमाणे उंची कमी असणारे १९ टक्के बालके, वयाप्रमाणे वजन कमी असणारे ३५ टक्के बालके आढळली. या सर्वेक्षणात जिल्ह्यात पाच वर्षाखालील मुलांचे कुपोषण जास्त असल्याचे आढळले. यासाठी मुख्य कार्यकारी अधिकारी मीनल करनवाल यांनी ठोस पाऊल उचलले आहे. आता आयआयटी मुंबई यांच्या समन्वयाने जिल्ह्यात सुपोषणासाठी काम केले जाणार आहे.

आयआयटीच्या मुंबईच्या माध्यमातून जिल्ह्यातील आशा व अंगणवाडी कर्मचारी यांचे आहारशास्त्रामध्ये कौशल्यवर्धन केले जाणार आहे. तसेच गर्भवती माता, स्तनदा माता व त्यांच्या कुटुंबियांचे समुदेशनही केले जाणार आहे. या संदर्भाने आरोग्य तसेच महिला व बाल विकास विभागाचे अधिकारी व कर्मचाऱ्यांची बैठक घेण्यात आली. या उपक्रमासाठी दोन्ही विभागातील २५० अधिकारी, कर्मचाऱ्यांचे आयआयटी मुंबई यांच्याकडून प्रशिक्षण दिले जाणार आहे. त्यानंतर प्रायोगिक तत्त्वावर कुपोषित बालकांना चांगले करण्यासाठी गावस्तरावर विशेष उपक्रम राबविण्यात येईल. या माध्यमातून जिल्हा कुपोषणमुक्त होईल.

- मीनल करनवाल, मुख्य कार्यकारी अधिकारी.

बालकांतील कुपोषणाची कारणे

बालकांच्या कुपोषणाची कारणे पाहिली तर त्यामध्ये बालकांना वेळेत स्तनपान न करणे, बालकांना चुकीच्या पद्धतीने स्तनपान करणे, बाळ जन्मल्यानंतर एक तासाच्या आत स्तनपान न करणे, बाळाच्या आहाराबद्दल विविध अंधश्रद्धा बाळगून त्या पद्धतीने बाळाच्या आहारात बदल करणे, बाळाला सहा महिन्यापर्यंत स्तनपान न करणे आदी बालकातील कुपोषणाची कारणे आहेत.