नांदेड : कोरोना चाचणीसह लसीकरणही वाढले

नांदेड : मागील काही दिवसांपासून जिल्ह्यातील कोरोना चाचण्यांचा वेग मंदावला होता. दिवसाला कधी तीनशे, पाचशे तर कधी आठशेच्या जवळपास स्वॅब तपासले जात होते. त्यामुळे बाधित रुग्णांची संख्या देखील कमी दिसत होती. मात्र, राज्यभरात कोरोना व ओमिक्रॉनचे रुग्ण वाढत असल्याने जिल्ह्यातील मंदावलेल्या कोरोना चाचण्यांचा वेग आणि लसीकरणाने पुन्हा जोर धरला आहे.(Vaccination also increased with corona testing)

जिल्ह्यात कोरोना पहिला रुग्ण आढळल्यापासून बुधवारपर्यंत (ता. पाच जानेवारी) जिल्हाभरातील आठ लाख एक हजार १२४ जणांचे स्वॅब घेण्यात आले आहेत. त्यापैकी सहा लाख ९६ हजार ८८७ जणांचे अहवाल निगेटिव्ह आले आहेत. तर आत्तापर्यंत ९० हजार ६४६ जणांचे अहवाल कोरोनाबाधित आले आहेत. त्यापैकी ८७ हजार ८८८ जणांवर उपचार करुन त्यांना घरी पाठविण्यात आले. दोन हजार ६५५ जणांचा कोरोनाने मृत्यू झाला आहे.(Nanded news)

डिसेंबर अखेरपर्यंत कोरोना प्रतिबंधात्मक लसीचे दोन डोस पूर्ण झालेल्या ग्रामीण भागातील नागरिकांची संख्या एक लाख ८७ हजार ५३१ तर शहरी भागात ४३ हजार ९३०, महापालीका क्षेत्रात ४० हजार ५२९ झाली आहे. एक डोस घेतलेल्या नागरीकांची ग्रामीण भागातील संख्या चार लाख ३० हजार १६७, शहरी भागातील एक लाख १२ हजार ६१५ तर महापालीका क्षेत्रात एक लाख ६४ हजार ९५० इतकी आहे. एक डोस घेतलेल्यांची एकत्रीत संख्या सात लाख सात हजार ७३२ तर दोन डोसपूर्ण झालेल्यांची एकत्रित संख्या दोन लाख ७१ हजार ९९० इतकी झाली आहे. आरोग्य विभागापुढे ६० टक्के नागरिकांचे लसीकरण करण्याचे आव्हान आहे. त्यासाठी आरोग्य विभागास सर्वांचे तातडीने लसीकरण करणे व संशयीत व्यक्तींचे जास्तीत जास्त प्रमाणात स्वॅब तपासणीसाठी घेणे, महत्वाचे आहे.

मंगळवारी १५ ते १८ वयोगटात झालेले लसीकरण

• ग्रामीण भाग - नऊ हजार ५६५

• नगरपालिका क्षेत्र - एक हजार ६९५

• महापालिका क्षेत्र - सहा हजार २००

• एकुण लसीकरण - १७ हजार ४६०

(तरुण - तरुणींनी लसीचा पहिला डोस घेतला आहे.)