Navratri Ashtami 2022 : यंदा अष्टमीला आहे शुभ योग जो देईल वैवाहिक जीवनात आनंद

Shardiya Navratri Ashtami puja 2022 : शारदिय नवरात्रोत्सवात प्रत्येक दिवशी तिथीप्रमाणे देवीच्या विविध रुपांची पुजा भाविक भक्तांकडून मोठ्या भक्तीभावाने केली जाते. नवरात्री उत्सव पर्वात कुळातील परंपरेप्रमाणे घटस्थापना, अष्टमी-नवमीला कुळाचार, कुमारिकापुजनाला विशेष महत्व आहे. यंदा नवरात्रोत्सवात अष्टमीला एक विशेष योग आहे. चला तर जाणून घेवूया हा शुभ योग कोणता आहे.

(Shardiya Navratri Ashtami puja 2022 auspicious yoga)

पुराणात आहे अष्टमीचे महत्व

मार्कंडेय पुराणामध्ये अष्टमी तिथीला देवी पूजनाचे महत्व सांगितले आहे. त्यानुसार अष्टमीला देवी पूजन केल्याने सगळ्या प्रकारचे मानसिक, शारीरिक, आर्थिक त्रास दूर होतात. घरामध्ये कधीच दारिद्रता येत नाही. ज्योतिष शास्त्रात अष्टमी तिथीस बलवान आणि व्याधी नाशक तिथी सांगितले आहे. या तिथीची देवता शंकर भगवान आहेत.

जाणून घ्या अष्टमीचा शुभ योग

यंदा 03 ऑक्टोबर महाअष्टमी साजरी होणार असून या दिवशी शोभन नावाचा शुभ योग तयार होत आहे. शोभन योग 02 ऑक्टोबर रविवार रोजी संध्याकाळी 5 वाजून 12 मिनीटांपासून सुरू होईल आणि 03 ऑक्टोबर सोमवार रोजी दुपारी 02 वाजून 20 मिनीटांपर्यंत असेल. ज्योतिषशास्त्रात शोभन योग अत्यंत शुभ मानला जातो. या योगात पुजा केल्याने व्यक्तीचे व्यक्तीत्वाचे आकर्षण वाढते. कोणत्याही नविन कार्याची सुरुवात या योगापासून केल्यास ते यशस्वी होतात. यासह वैवाहिक जीवनात आनंद मिळतो असेही सांगितले जाते.