ट्रक खरेदीसाठी बोलावून शेतकरी तरुणाला ७० हजारांना लुटले

नागाव (कोल्हापूर)  : ओएलएक्‍स ॲपच्या आधारे शिये फाटा येथे वाहन खरेदीसाठी बोलावून मजरेवाडी (ता. शिरोळ) येथील शेतकरी तरुणाची ७० हजार रुपयांची लूट केली. चिंतामणी संजय मडिवाळ (वय ३१) असे त्यांचे नाव आहे. पुणे-बंगळूर महामार्गावर काल (ता. ५) दुपारी दीडच्या सुमारास शिये फाटा येथे हा प्रकार घडला. 

याबाबत पोलिसांनी दिलेली माहिती अशी :

ओएलएक्‍स ॲपवर ट्रक विक्रीची जाहिरात होती. यात दिलेल्या मोबाईल क्रमांकावर मडिवाळ यांनी संपर्क साधला. त्या वेळी समीर नावाच्या व्यक्तीने आपण एजंट आहे, तुम्ही गाडी पाहण्यासाठी एका फायनान्स कंपनीच्या शिये फाटा येथील गोदामाजवळ या, असे सांगितले. मडिवाळ शिये फाटा येथे आले; तेव्हा तीन जण त्यांची वाट पाहत होते. 

हेही वाचा- कोल्हापुरात शरीरसौष्ठवपटूंत ‘कहीं खुशी कहीं गम’ -

त्यातील एकाने खांद्यावर हात ठेवून बोलत बाजूला नेले. दरम्यान, सोबत असलेल्या दोघांनी ७० हजार रुपये असलेली बॅग हिसकावून मोटारसायकलवरून बंगळूरच्या दिशेने पोबारा केला. त्यांच्या मागे धावेपर्यंत बोलणाराही पळून गेला. 

संपादन - अर्चना बनगे