कोयना आणि महाराष्ट्र एक्‍सप्रेसचे बुकींग उद्यापासून 

कोल्हापूर - कोयना आणि महाराष्ट्र एक्‍सप्रेस रेल्वे गाड्यांचे बुकींग उद्या (ता.9) पासून सुरू झाले आहे. 11 ऑक्‍टोबर पासून महाराष्ट्र एक्‍सप्रेस तर कोयना एक्‍सप्रेस 13 ऑक्‍टोबर पासून सुरू होत आहे. विशेष म्हणजे केवळ बुकींग असलेल्या प्रवाशांनाच यामधून प्रवेश करता येणार आहे. 

सनासाठी मध्य रेल्वेने विशेष गाड्या सोडण्याचे नियोजन केले आहे. त्यामध्ये कोल्हापुरातून दोन गाड्या सुटणार आहेत. कोयना एक्‍सप्रेस ही मुंबई-कोल्हापूर 13 ऑक्‍टोबर पासून पुढील सूचना मिळेपर्यंत छत्रपती शिवाजी महाराज टर्मिनस येथून दररोज सुटेल आणि त्याच दिवशी कोल्हापूरला पोहोचेल. तसेच 12 ऑक्‍टोबरपासून पुढील सूचना मिळेपर्यंत कोल्हापूर येथून दररोज सुटेल आणि त्याच दिवशी छत्रपती शिवाजी महाराज टर्मिनसला पोहोचेल. 

श्री छत्रपती शाहू महाराज टर्मिनस कोल्हापूर ते गोंदिया विशेष गाडी 11 ऑक्‍टोबर पासून पुढील सूचना मिळेपर्यंत श्री छत्रपती शाहू महाराज टर्मिनस कोल्हापूरहून दररोज सुटेल आणि दुसऱ्या दिवशी गोंदियाला पोहोचेल. तसेच हीच गाडी 13 ऑक्‍टोबरपासून पुढील सूचना मिळेपर्यंत गोंदिया येथून दररोज सुटेल आणि दुसऱ्या दिवशी श्री छत्रपती शाहू महाराज टर्मिनस कोल्हापूरला पोहोचेल. 

हे पण वाचा - ... आणि महापालिका आयुक्त डॉ. कलशेट्टी यांना रडू कोसळे

गाड्यांचे आरक्षण उद्या (ता.9) सकाळी नऊ पासून सर्व आरक्षण केंद्रांवर आणि www.irctc.co.in या वेबसाइटवर बुकींग सुरू होणार आहे. केवळ आरक्षित तिकिट असलेल्या प्रवाशांना या विशेष गाड्यांमध्ये प्रवासाची परवानगी देण्यात येईल. प्रवाशांनी बोर्डिंग, प्रवासादरम्यान आणि गंतव्यस्थानी कोविड 19 शी संबंधित सर्व निकषांचे पालन करावे लागणार आहे. 

संपादन - धनाजी सुर्वे