शिवाजी पेठ परिसरात सीसीटीव्ही 

कोल्हापूर  : शिवजयंतीच्या निमित्ताने शिवाजी पेठ परिसरात सीसीटीव्ही कॅमेरे बसविण्याची घोषणा आमदार चंद्रकांत जाधव यांनी आज केली. शिवाजी तरूण मंडळातर्फे सकाळी शिवजन्मकाळाचा सोहळा झाला. नंतर झालेलय कार्यक्रमात जाधव यांनी घोषणा केली. जिल्हा पोलिस अधीक्षक डॉ. अभिनव देशमुख उपस्थित होते. उभा मारूती चौक येथे शिवाजी तरूण मंडळातर्फे भव्य व्यासपीठ उभारले गेले आहे. तीन दिवसापासून येथे विविध सांस्कृतिक कार्यक्रम सुरू आहेत. 

यावेळी आमदार जाधव यांनी "शिवाजी पेठ जे ठरविते ते करून दाखविते. मी आज जे काही आहे, ते तुमच्यामुळेच, पेठेची सुरक्षितता अधिक अबाधित राहावी यासाठी सीसीटीव्ही कॅमेरे बसवू. 

डॉ. देशमुख यांनी शिवाजी तरूण मंडळाच्या उपक्रमांचे कौतुक केले. मंडळाचे अध्यक्ष सुजित चव्हाण. देवस्थान समितीचे अध्यक्ष महेश जाधव, संभाजी पाटील, मोहनराव शेळके, बबन कोराणे, सदाभाऊ शिर्के, सुरेश जरग आदी उपस्थित होते. 

उभा मारूती चौक सेल्फी पॉंईट 
येथील छत्रपती शिवाजी महाराज यांचा अश्‍वारूठ पुतळा, व्यासपीठाची शिवकालीन सजावट यामुळे उभा मारूती चौक सेल्फी पॉंईट ठरला आहे. लहान मुलांना पुतळ्यासोबत छायाचित्र घेता यावे, यासाठी स्वतंत्र व्यवस्था केली आहे. सकाळी लिटल वन्डर प्ले स्कूल शाळेची मिरवणूक येथे आली. शालेय विद्यार्थ्यांना वेगवेगळ्या रूपात सजवून रथातून त्यांना उभा मारूती चौक येथे आणले. हाती भगवे झेंडे घेतलेल्या शिक्षिका. "छत्रपती शिवाजी महाराज की जय' अशी घोषणा यामुळे परिसर शिवयम झाला.