पेच अखेर सुटला ; नाशिक मालेगाव कॅंप येथील उप-अधीक्षक मंगेश चव्हाण यांची शहर पोलिस उपअधीक्षकपदी नियुक्ती

कोल्हापूर : शहर पोलिस उपअधीक्षक पदाचा पेच अखेर सुटला. नाशिक मालेगाव कॅंप येथील उप-अधीक्षक मंगेश शांताराम चव्हाण यांची या पदावर नियुक्ती झाली. तत्पूर्वी पदाची सूत्रे घेण्यापूर्वीच बाबूराव महामुनी यांची बदली इचलकरंजी पोलिस उप-अधीक्षकपदी बदली झाली. याबाबतचे आदेश बुधवारी रात्री गृह विभागाकडून प्राप्त झाले.

शहर पोलिस उपअधीक्षक प्रेरणा कट्टे यांची नागपूरला बदली झाली. अवैध धंद्यांवर कारवाई करणाऱ्या कट्टे यांची गैरसोईच्या ठिकाणी झालेल्या बदलीबाबत जिल्ह्यात उलटसुलट चर्चा सुरू झाली होती. याबाबत विविध संघटनांनी निवेदने देऊन बदली रद्द व्हावी, अशी मागणी केली होती. त्यानंतर कट्टे यांची पिंपरी चिंचवड येथे बदली झाली. यानंतर हे पद काही दिवस रिक्त होते. या पदावर तत्कालीन गृह-पोलिस उपअधीक्षक बाबूराव महामुनी यांची निवड झाली; पण त्यांनी सूत्रे घेतली नव्हती. त्यांनी इचलकरंजीला बदली मिळावी, असे प्रयत्नही सुरू केल्याची चर्चा सुरू होती.

हेही वाचा- साखर उद्योगाला दिलासा ; इथेनॉल दरवाढीवर केंद्राची मोहोर -

दरम्यान त्यांची इचलकरंजीला बदली झाली. दरम्यान शहर पोलिस उपअधीक्षक मंगेश चव्हाण यांची नियुक्ती झाल्याचे आदेश गृहविभागाकडून प्राप्त झाले. राज्यातील एकूण ३५ उपअधीक्षकांच्या बदल्या बुधवारी रात्री करण्यात आल्या. 
दरम्यान, कार्यकाल पूर्ण झालेल्या कोल्हापुरातील बिनतारी संदेश विभागातील रियाज शेख यांची सांगली येथे बदली झाली. याबाबतचे आदेश पोलिस महासंचालक कार्यालयामार्फत प्राप्त झाले.

संपादन - अर्चना बनगे