कोल्हापूर: कोरोनामुळे घरी बसलेल्या विद्यार्थ्यांनी सुमारे 11 महिन्यानंतर महाविद्यालयात पाऊल ठेवले. लेक्चर्स, मित्र-मैत्रिणींच्या गाठीभेटी व नवे धडे शिकण्यात त्यांचा दिवस सरला. काही महाविद्यालयांत विद्यार्थ्यांचे पुष्पगुच्छ देऊन स्वागत केले. विद्यार्थ्यांच्या पन्नास टक्के उपस्थितीची अट असली तरी सोशल डिस्टन्सचा फज्जा उडाल्याचे चित्र दिसले. दरम्यान, जिल्ह्यातील 121 महाविद्यालये, तर शिवाजी विद्यापीठातील 39 अधिविभाग सुरू झाल्याने कॅंपस विद्यार्थ्यांच्या गर्दीने गजबजला.
विद्यार्थ्यांच्या गर्दीने गजबजला कॅंपस
संचारबंदीत महाविद्यालयांचे दरवाजे बंद होते. नववी ते बारावीचे वर्ग सुरू झाल्यानंतर उर्वरित वर्ग कधी सुरू होणार याची प्रतीक्षा होती. काही दिवसांपूर्वी उच्च व तंत्रशिक्षण मंत्री उदय सामंत यांनी 15 फेब्रुवारीपासून वर्ग सुरू होणार असल्याची घोषणा केली. शासकीय आदेशाचे पालन करून महाविद्यालयीन प्रशासनाने वर्ग सुरू करावेत, असे आदेश दिले. त्यानुसार आज महाविद्यालये सुरू झाली. काही महाविद्यालयात विद्यार्थ्यांचे थर्मल स्क्रीनिंग केले. सॅनिटायझरचा पुरवठाही केला.
सेल्फीने लुटला आनंद...
विद्यार्थी-विद्यार्थिनींनी सेल्फी घेऊन आनंद लुटला. त्यांनी लगेचच त्यांचे फोटो डीपीसह स्टेटसवर झळकवले.
महाविद्यालयात कधी पाऊल ठेवते, याची उत्सुकता होती. कोरोनामुळे त्यावर पाणी फिरले. मात्र, आता महाविद्यालयात पहिल्यांदाच पाऊल ठेवले. नव्या मैत्रिणींची ओळख झाली. पहिला दिवस आनंदात गेला.
-ईशा तांबट, न्यू कॉलेज
आज पहिले लेक्चर अटेंड केले. नव्या मित्रांच्या सहवासात महाविद्यालयाच्या परिसरात फेरफटका मारला. पहिल्या दिवसाचा अनुभव खूपच वेगळा होता.
-चैतन्य यादव, न्यू कॉलेज
संपादन- अर्चना बनगे
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.