मॅडम, आमचं काम तेवढं थांबवू नकासा बगा..!

कोल्हापूर - घरोघरी धुण्याभांड्याची कामे करून उदरनिर्वाह चालविणाऱ्या घरेलू महिला कामगारांना लॉकडाऊनमुळे सध्या सक्तीने घरी बसावे लागले आहे. या महिला ज्यांच्या घरी काम करतात, त्यांनीच या महिलांना कामाला न येण्याची सूचना दिली आहे. यात गैरहजेरीचा पगार दिला जाणार नसल्याचेही बजावल्याने घरेलू कामगारांसमोर पेच आहे. अशात समजुतीचा भाग म्हणून किमान गैरहजेरी काळातील पगार मिळावा व लॉकडाऊन संपल्यानंतर काम कायम सुरू ठेवावे, अशी अपेक्षा महिला कामगार व्यक्त करीत आहेत.

वाचा - मार्ग काय सापडेना : कोल्हापूरला जायचं म्हणत माऊलीने सोडले प्राण... 

शहरातील विविध कॉलनीत नोकरदार, व्यावसायिक व घरगुती महिलांच्या मदतीसाठी घरेलू कामगार अनेक फ्लॅट, बंगल्यात, घरात नियुक्त आहेत. त्या सकाळी आठ वाजल्यापासून सायंकाळी सहा वाजेपर्यंत घरोघरी जाऊन धुणी-भांडी काम करतात. कोरोनाचे गांभीर्य ओळखून अनेकजण होम क्वारंटाईन झाले. घरातील महिलांना कामच उरले नाही, अशा महिलांनी घरातील कामे स्वतः सुरू केली आणि घरेलू कामगारांना कामावर येऊ नका, असे सांगितले.

यातून दहा-बारा घरची कामे करून गुजराण करणाऱ्या या महिलांवर कोरोना लॉकडाऊनमुळे उदरनिर्वाहाचा प्रश्‍न निर्माण झाला. लॉकडाऊन नंतर हातावरचे पोट असणाऱ्यांचे कामच थांबले. दोन चार घरची कामे करून मिळणाऱ्या पैशांतूनच या महिलांच्या घरचा खर्च भागतो. मुलांचे शिक्षणही चालू राहते. अशा वेळी जर घरी बसावे लागले, तर येणाऱ्या दिवसात खायचे काय ? मुलांच्या शिक्षणाचा खर्च कसा पेलायचा ? असे अनेक प्रश्‍न त्यांना सतावत आहेत.
 

मी स्वयंपाकाची कामे करते. माझे पती रिक्षा चालक आहेत. संचारबंदीमुळे दोघांचेही काम बंद आहे. कमाई नसल्याने घर कसे चालवायचे, असा प्रश्‍न दोघांनाही पडला आहे. यंदा मुलगा दहावीला जाणार असल्याने त्याच्या शिक्षणाचा खर्चही वाढणार आहे.
- मनीषा नलवडे

घरेलू महिला कामगार या स्वतः चार-पाच घरची कामे करून घरखर्चासोबत मुलांच्या शिक्षणाचा खर्च भागवतात. त्यांची कामे जर कमी झाली तर त्यांची अवस्था दयनीय होईल.
- सुशीला यादव, अध्यक्षा, घरेलू मोलकरीण संघटना