कोरोनाची धास्ती : तो दुबईहून आला आणि सोसायटीने केले हे.....वाचा

कोल्हापूर  : तुमच्या घरात कोरोनाचा रुग्ण आहे. तुम्ही सोसायटी सोडून बाहेर राहा, असे म्हणत रमणमळा परिसरातील एका गृहनिर्माण सोसायटीमध्ये एका कुटुंबाला बाहेर काढण्यासाठी दबाव आणल्याचा प्रकार आज घडला. दरम्यान, संबंधित व्यक्तीची कोरोना तपासणीची चाचणी निगेटिव्ह आल्यानंतर गृहनिर्माणमधील सदस्यांनी मवाळ भूमिका घेतली. 

रमणमळ्यात कुटुंबाला बाहेर काढण्याचा प्रयत्न
रमणमळा परिसरातील एका गृहनिर्माण सोसायटीमध्ये रहिवासी असणाऱ्या एका कुटुंबातील सदस्य सकाळी दुबईहून परत आला. दरम्यान, ही व्यक्ती सोसायटीमध्ये आल्याचे इतर सदस्यांना व रहिवाशांना कळले. त्यानंतर कोरोनाच्या भीतीने दुबईहून आलेल्या व्यक्तीसह त्यांच्या कुटूंबियांना तिथून बाहेर जाण्यास सांगू लागले. दरम्यान, ही माहिती एका फ्लॅटधारकाने तहसीलदार कार्यालयाला सांगितली. तर, त्याच वेळी तेथील कुटुंबियांनी संबंधित कुटुंबातील सोसायटीतून बाहेर जाण्यास दबाव टाकू लागले.

हेही वाचा- सावधान ! आता कोरोना पाठोपाठ आला हा वायरस...

दुबईहून आलेली व्यक्ती कोरोनाबाधित नाही

हा प्रकार समजताच दुपारी कसबा बावडा तलाठी कार्यालयातील एक कर्मचारी या ठिकाणी पोचले. त्या कर्मचाऱ्याने संबंधित कुटूंबियांची भेट घेतली. याचवेळी त्या व्यक्तीचा भाऊ आणि ते सीपीआरमध्ये कोरोनाची तपासणी करण्यासाठी गेले. त्यानंतर त्यांचा रिपोर्ट निगेटिव्ह आल्याचे स्पष्ट झाले. त्यानंतर गृहनिर्माण संस्थेतील लोकांनीही सुटकेचा निश्‍वास सोडला. 

 हेही वाचा-दैव बलवत्तर म्हणून वाचला जीव नाहीतर.....
बहिष्कार नको 
पुण्यात कोरोनाग्रस्तावर बहिष्कार टाकण्याचा निर्णय काही कुटुंबांनी घेतला होता. त्यानंतर आता असाच प्रकार कोल्हापुरात घडू नये यासाठी  जिल्हा प्रशासनाने दक्षता घेतली आहे. दरम्यान, गरज असल्यास अशा कुटुंबियांना पोलीस प्रशासनाने सुरक्षा द्यावी, असे निर्देश जिल्हा प्रशासनाकडून दिले आहेत.