हातकणंगले (कोल्हापूर) : रुकडी (ता. हातकणंगले) येथे बुधवारी मध्यरात्री झालेल्या घरफोडीत चार लाखांचा ऐवज चोरट्यांनी चोरून नेला. चोरट्यांनी तेथील एकनाथ दत्तात्रय कुलकर्णी यांच्या बंद घराचा दरवाजा तोडला. त्यानंतर घरातील तिजोरी फोडली व त्यातील सोने, चांदीचे दागिने आणि रोख रक्कम चोरून नेली.
याबाबत हातकणंगले पोलिसांनी दिलेली माहिती अशी ः आज सकाळी शेजाऱ्यांना चोरीचा प्रकार निदर्शनास आला. त्यांनी याची माहिती माजी उपसरपंच शीतल खोत यांना दिली. त्यांनी पोलिसांशी संपर्क साधला. गावातील महादेव मंदिराशेजारी भरवस्तीत एकनाथ कुलकर्णी यांचे घर आहे. ते पत्नी समवेत राहतात. ते निवृत्त बॅंक कर्मचारी, तर पत्नी निवृत्त पोस्ट कर्मचारी आहे. हे दाम्पत्य घरगुती कार्यक्रम असल्याने बाहेर गावी गेले होते. बुधवारी रात्री चोरट्याने त्यांच्या बंद घराचा कडीकोयंडा तोडून घरात प्रवेश केला. तिजोरी फोडून त्यातील पाच तोळे सोने, चांदीचे दागिने व रोख रकमेसह सुमारे चार लाख दहा हजार रुपयांचा मुद्देमाल चोरला. या प्रकाराने नागरिकांमध्ये घबराहट आहे. पथकातील श्वानाने घटनास्थळापासून शेतापर्यंतचा माग दाखविला. तेथे श्वान घुटमळले. ठसेतज्ज्ञांना काही ठसे मिळाले आहेत. ते पुरुषाचे असल्याचे निदर्शनास आले आहे.
संपादन - स्नेहल कदम
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.