कोल्हापुरातील सार्वजनिक ग्रंथालये सुरू करा ; विद्यार्थ्यांची मागणी

कोल्हापूर : कोरोनात शाळा, महाविद्यालये, विद्यापीठे लॉकडाउन झाल्याने विद्या संस्थांतील अभ्यासिका, ग्रंथालयांना सहा महिने टाळेच आहेत. अन्‌लॉकमध्ये बऱ्याच गोष्टी सुरू होत असताना शैक्षणिक संकुले मात्र बंद आहेत. विद्यापीठाच्या परीक्षा सुरू झाल्या; पण ग्रंथालय, स्टडी हॉलचे कुलूप कधी उघडले जाणार याची वाट विद्यार्थी पाहत आहेत. 

विद्यापीठाने अंतिम वर्षाच्या परीक्षा सुरू केल्या आहेत तसेच युजीसी नेट परीक्षाही सुरू आहेत. आगामी सेट तसेच विविध स्पर्धा परिक्षेच्या तयारीला विद्यार्थी लागलेले आहेत. लॉकडाऊन काळात काही दिवस विद्यार्थी अभ्यासापासून दूर होते. ऑनलाईन क्‍लासेस, स्टडी मटेरिअल विद्यार्थ्यांना मिळत असले तरी ग्रंथालये बंद असल्याने क्रमिक तसेच संदर्भ पुस्तके विद्यार्थ्यांना मिळत नाहीत. घरी अभ्यासाला अनुकूल वातावरण मिळत नसल्याने विद्यार्थी रीडिंग हॉलला पसंती देतात; परंतु तेही बंद असल्याने अभ्यासावर परिणाम झाला आहे. ग्रंथालये तसेच रीडिंग हॉल खुला करण्याची मागणी सध्या विद्यार्थ्यांन कडून होत आहे. 

हेही वाचा - वाफाळलेल्या चहाची लज्जत भारी ; कोल्हापुरच्या ऑटोमशिनची किमयाच न्यारी 

संशोधन ही थांबले

शिवाजी विद्यापीठातील विविध अधिविभागामधील संशोधक विद्यार्थी संशोधनाचे काम करतात परंतु संदर्भ ग्रंथ मिळत नसल्याने त्याचे संशोधन थांबले आहे. शोध प्रबंध पूर्ण करण्यासाठी मार्गदर्शकांनी अभ्यासण्यास सांगितलेली पुस्तके सध्या या विद्यार्थ्यांना उपलब्ध होत नाहीत. जर संदर्भासाठी पुस्तकेच मिळाली नाहीत तर संशोधन पुढे कसे करायचे हा प्रश्न उपस्थित झाला आहे. 
 

रीडिंग हॉलची गरज 

शिवाजी विद्यापीठातील बॅरिस्टर बाळासाहेब खर्डेकर ग्रंथालयाच्या रीडिंग हॉलची क्षमता ८०० विद्यार्थ्यांची आहे. तसेच विमान बिल्डंग येथील स्टडी सेंटरची क्षमता २०० विद्यार्थी आहे. सोशल डिस्टंन्स, सॅनिटायझर, मास्कची सक्ती करत निम्म्या क्षमतेने हे स्टडी हॉल तसेच पुस्तक देवघेव सुरु करणे गरजेचे आहे. विद्यार्थी परत अभ्यासाच्या अन्‌ संशोधनाच्या प्रवाहात येतील. 

"शैक्षणिक संकुले बंदच ठेवण्याचे आदेश आहेत. त्यामुळे ग्रंथालये, स्टडी हॉल बंदच आहेत. निम्म्या स्टाफवरच आमचे काम सुरू आहे. सध्या फक्त पुस्तके जमा करून घेत नो ड्यूज देत आहोत. प्रशासनाकडून पुढे सूचना आल्या तर खबरदारी घेऊन हे सुरू करता येईल."

- डॉ. नमिता खोत, संचालक, बॅ. खर्डेकर ग्रंथालय

हेही वाचा - कोल्हापुरी गुळाच्या गोडव्याची परदेशात मागणी 

"हॉटेल, रेस्टॉरंट इतर गोष्टी तर शासनाने सुरू केल्या; परंतु ग्रंथालये, स्टडी हॉल या आमच्या गरजेच्या गोष्टी मात्र बंद आहेत. अभ्यासाला वेळ मिळाला नाही म्हणून शासन परीक्षा रद्द केल्या, पण आता विद्यार्थ्यांना अभ्यासासाठी या गोष्टी खुल्या होणे गरजेचे आहे."

- निखिल गायकवाड, विद्यार्थी

"अभ्यासासाठी शांतता आवश्‍यक असते. विद्यापीठात ते आहे.आम्हाला जर स्टडी हॉल उपलब्ध झाला तर अभ्यास चांगला करता येईल. आगामी परीक्षेच्या दृष्टीने तयारी करता येईल, तरी प्रशासनाने लवकर ग्रंथालये, अभ्यासिका सुरू कराव्यात."

-  मेघना कावळे, विद्यार्थिनी

संपादन - स्नेहल कदम