आता नागरी बॅंकांना लाभांश वाटप करता येणार नाही

कोल्हापूर : रिझर्व्ह बॅंकेच्या परवानगीशिवाय नागरी बॅंकांना लाभांश वाटप करता येणार नाही. रिझर्व्ह बॅंकेनेच तसे निर्बंध घातल्याची माहिती नागरी बॅंक असोसिएशनचे अध्यक्ष निपुण कोरे यांनी आज निवेदनाद्वारे दिली आहे. 

श्री. कोरे यांनी निवेदनात म्हटले आहे, की सहकारी संस्थांच्या वार्षिक सभा न झाल्याने मंत्रिमंडळाने सभासदांना लाभांश वाटपाचे अधिकार त्या त्या संस्थेच्या संचालक मंडळाला दिले आहेत. यावरून नागरी बॅंकांच्या सभासदांकडूनही लाभांशाबाबत विचारणा होत आहे. त्यातून सभासदांत गैरसमज होत आहे.

हेही वाचा- घरफाळा घोटाळ्यावरून  कोल्हापूर महापालिका सभेत गदारोळ -

नागरी बॅंकांना रिझर्व्ह बॅंकेकडून परवाना दिला जातो. रिझर्व्ह बॅंकेच्या नियंत्रणाखालीच या बॅंका चालतात. त्यामुळे रिझर्व्ह बॅंक परवानगी देत नाही, तोपर्यंत नागरी बॅंकांना लाभांश वाटप करता येणार नाही. सर्व बॅंकिंग क्षेत्राची आर्थिक स्थिती पाहूनच हा निर्णय होईल. यासाठी सहकारी बॅंकांतर्फे राज्य सहकारी बॅंक फेडरेशन रिझर्व्ह बॅंकेच्या परवानगीसाठी पाठपुरावा करत आहे. ही परवानगी मिळाल्यानंतर पुढील कार्यवाही करण्यात येईल.

संपादन- अर्चना बनगे