बेळगाव महापालिकेत प्रवेश बंदी... पण का...?

बेळगाव - बेळगाव महापालिकेच्या मुख्य कार्यालयातील प्रवेश बंदी निर्णयाची अंमलबजावणी सोमवारी (ता.6) सुरू झाली आहे. अधिकारी व कर्मचारी वगळता कार्यालयात कोणालाही प्रवेश देण्यात आलेला नाही. महापालिकेशी संबंधित अर्ज किंवा तक्रार दाखल स्विकारण्यासाठी आवक-जावक विभागातील कर्मचाऱ्यांची नियुक्ती करण्यात आली आहे. त्यासाठी मुख्य प्रवेशद्वाराजवळच एक कक्ष तयार करण्यात आला आहे. जन्म-मृत्यू दाखल्यांशी संबंधित अर्जही तेथेच स्विकारले जाणार आहे. अर्ज दाखल करण्यासाठी एकावेळी एकाच व्यक्तीला त्या कक्षात जाता येणार आहे. महापालिकेच्या या निर्णयामुळे मुख्य कार्यालय आवारातील गर्दीच कमी झाली आहे. गेल्या महिनाभरापासून कामकाजाच्या दिवशी महापालिकेचे कार्यालय गजबजून जात होते. पण सोमवारी कार्यालय आवारात शुकशुकाट होता.

बेळगाव शहरातील कोरोनाबाधीतांची संख्या दिवसेंदिवस वाढत आहे. आता शहरात सामूहीक संसर्ग सुरू झाल्याची भिती आरोग्य विभागातून व्यक्त होत आहे. त्यातच बेळगाव शहरातील विरभद्रनगर येथील एका व्यक्तीचा कोरोनामुळे मृत्यू झाला आहे. त्यामुळे आरोग्य विभाग दक्ष झाला आहे. शासकीय कार्यालयात दररोज नागरीकांची गर्दी होते. त्यातही बेळगाव महापालिकेत जास्त गर्दी होते. ही गर्दी टाळण्याच्या दृष्टीने उपाययोजना राबविल्या जात आहेत. त्याचाच भाग म्हणून बेळगाव महापालिकेत प्रवेश करण्यास नागरीकांवर निर्बंध घालण्यात आले आहेत. पण महापालिकेचे दैनंदिन कामकाज मात्र सुरूच राहणार आहे.

वाचा - हुपरीत खुदाई चालू असताना आढळून आल्या 'या' जुन्या मुर्ती...

नागरीकांनी आपला अर्ज किंवा तक्रार दाखल केल्यानंतर त्यांच्याकडून संपर्क क्रमांक घेतला जात आहे. त्यांचे काम झाले की त्यांच्याशी पालिकेचे संबंधित कर्मचारी संपर्क साधतील व माहिती देतील. महापालिकेत जन्म व मृत्यू दाखल्यांसाठी सर्वाधिक गर्दी होती. ही गर्दी टाळण्यासाठी अर्जही कार्यालयाच्या प्रवेशद्वाराजवळच घेतले जाणार आहेत. दाखले तयार झाले की संबधित अर्जदारांना त्याची माहिती दिली जाणार आहे. महापालिकेने हा कक्ष सुरू केला असला तरी नागरीकांची कामे निर्धारीत वेळेत खरेच होणार का? असा प्रश्‍नही उपस्थित झाला आहे. महापालिकेत आपली कामे घेवून जाणाऱ्या बेळगावकरांनी तेथील दप्तरदिरंगाईचा खूप वाईट अनुभव आहे. महापालिका कार्यालयाचे उंबरठे झिजवूनही कामे होत नाहीत. त्यामुळे आता प्रवेशबंदीनंतर कामे कशी होणार? असा सवालही त्यानी उपस्थित केला आहे.