अन्... घरातील ४० वर्षांचा अंधार झाला दूर...

कोल्हापूर - घरात चाळीस वर्षांचा अंधार. दिवा लावूनच घराला प्रकाशमान करण्याचा खटाटोप. वीज घेण्यासाठी ना पैसे, ना अर्ज करण्याची माहिती. प्रतिकूल परिस्थितीला भेदण्याचं सामर्थ्यचं नाही, तिथं घरात वीज देणारा मदतीचा हातही नाही. महावितरणच्या कर्मचाऱ्यांच्या हृदयाला फुटलेल्या पाझरानं मात्र यळगूडच्या (ता. हातकणंगले) पार्वतीबाई कांबळे यांचं घर प्रजासत्ताकदिनी प्रकाशमान झालं. 

अधिकार्यांनी घातले स्वत:च्या खिशातील पैसे

पार्वतीबाई यांच वय ऐंशीहून अधिक. त्यांच विटा-मातीच साधं कौलारू घर. जेवणासाठी चूल आणि भिंतीवरील फळ्यांवर भांड्यांची रांग. वीज नसल्याने दिवा लावूनच त्या जेवण करायच्या. आठवडाभरापूर्वी वीजमीटर रिडींग एजन्सीचे म्हाळू मुदाळे यांना त्यांच्या घरात वीज नसल्याची माहिती मिळाली. त्यांनी ती अधिकाऱ्यांच्या कानावर घातली. अधिकारी व रिडींगच्या कर्मचाऱ्यांनी स्वत:च्या खिशातील पैसे काढून त्यांच्या घरात फिटिंग केले. हुपरीचे उपकार्यकारी अभियंता रामेश्वर कसबे, हुपरी ग्रामीणचे शाखा अभियंता सोमय्या जमादार, हुपरीचे सुनील मंगसुळी व रिडींग एजन्सीचे म्हाळू मुदाळे यांनी मीटर बसवून घर प्रकाशमान केले.

वाचा - देवा... एक तरी नात ठेवायची होती... 

पार्वतीबाई आजही कष्ट करून उदरनिर्वाह करतात. त्यांना वीजबिल देणे शक्‍य नाही. त्यांचा बीपीएल योजनेत समावेश केला जाणार आहे. त्यांचे वीजबिल महावितरण व मीटर रीडिंग एजन्सीचे कर्मचारी भरतील. 
- रामेश्‍वर कसबे, उपअभियंता