लॉक डाऊनच्या कालावधीत जप्त केलेली वाहने इचलकरंजीकरांना परत मिळणार ?

इचलकरंजी - कोरोनाच्या पार्श्‍वभूमीवर कोल्हापूरच्या धर्तीवर लॉक डाऊनच्या कालावधीत जप्त करण्यात आलेली वाहने परत देण्याच्या हालचाली सुुरु आहेत. शहरातील तीन पोलीस ठाणे व एक वाहतूक शाखा यांनी केलेल्या कारवाईत तब्बल पाच हजार वाहने ताब्यात घेण्यात आली आहे. दंडात्मक कारवाई करुन ही वाहने देण्याबाबत पोलीस यंत्रणेकडून नियोजन सुरु आहे.

कोरोनाचा प्रादुर्भाव रोखण्यासाठी शासनाकडून लॉक डाऊन घोषीत करण्यात आले आहे. त्यामुळे विनाकारण फिरणार्‍या वाहनधारकांवर पोलिस यंत्रणेने कारवाई केली होती. शहरातील गावभाग, शिवाजीनगर, शहापूर या तीन पोलीस ठाण्यांसह शहर वाहतूक शाखेकडून कारवाई करण्यात आली होती. आतापर्यंत सुमारे पाच हजार वाहने जप्त करण्यात आली आहेत. अद्यापही सकाळच्या सत्रात नाहक फिरणार्‍या दुचाकींवर कारवाईचे सत्र सुरुच आहे.
दरम्यान, कोल्हापूरात अशा प्रकारे ताब्यात घेण्यात आलेली वाहने 3 मे नंतर दंडात्मक कारवाई करुन संबंधित मालकांच्या ताब्यात दिली जाणार आहेत. याच पार्श्‍वभूमीवर इचलकरंजीतही कोल्हापूरच्या धर्तीवर वाहने दंडात्मक कारवाई करुन मालकांना परत देता येतील काय, याबाबत पोलीस यंत्रणेकडून हालचाली सुरु केल्या आहेत. वाहतूक शाखेकडून ताब्यात घेण्यात आलेली वाहने दंडात्मक कारवाई केली जाणार आहे. मात्र पोलीसांनी ज्या वाहनांवर रितसर गुन्हे दाखल केले आहेत, अशा वाहनांवर न्यायालयात खटले दाखल करण्याची शक्यता आहे.

वाचा - कोरोना रोखण्यासाठी बिंदू चौक कारागृहातून कैदी हलविणार

लॉक डाऊनच्या पुढील घोषणेकडे लक्ष

कोरोनाचा संसर्ग टाळण्यासाठी 3 मे पर्यंत लॉक डाऊनची परिस्थीती राहणार आहे. त्यानंतर पुढील निर्णय काय होणार, याकडे पोलीस यंत्रणेचे लक्ष आहे. या निर्णयावरच वाहने परत देण्याची पुढील कार्यवाही अवलंबून असणार असल्याची माहिती पोलीस यंत्रणेकडून देण्यात आली.

अनेक दुचाकी मालक प्रतिक्षेत

पोलीस कारवाईत अनेक सर्वसामान्य नागरिकांची वाहने जप्त करण्यात आली आहेत. सध्या सर्व वाहने बंद असल्यामुळे व हक्काचे वाहन पोलीसांच्या ताब्यात असल्यामुळे महत्वाचे काम असले तरी जाता येत नसल्याची परिस्थीती आहे. त्यामुळे अनेक दुचाकी मालक आपले वाहन ताब्यात कधी मिळणार या प्रतिक्षेत आहेत.